Цэргийн төв эмнэлэгт ДОХ-ын халдвартай иргэн хэвтэн эмчлүүлж байгаад нас баржээ. Гэвч тус иргэн өөрийгөө ДОХ-ын халдвартай гэдгээ хэлээгүй, тус эмнэлгээс цусны ерөнхий шинжилгээ авсан ч ДОХ-ын шинжилгээ аваагүй байна.

Үүний улмаас бөөрний диализын аппаратад орсон иргэд ДОХ-ын халдвар авсан байж болзошгүй нөхцөл байдал үүсжээ.

Тодруулбал, талийгаач Б нь Цэргийн төв эмнэлэгт аравдугаар сарын 5-нд  хүргэгдэж очсон бөгөөд ДОХ-ын халдвар тээгч гэдгийг нь мэдэлгүй архины хордлогын эмчилгээ хийж, бөөрний диализ аппарат залгаж, задлан шинжилгээ хийсэн байж болзошгүй аж. Ийнхүү арав хоногийн дараа буюу аравдугаар сарын 15-нд нас баржээ.

ДОХ-ын халдвар бэлгийн зам болон цусаар дамждаг. ДОХ-той хүний цусыг сэлбэсэн аппаратаараа бөөрний өвчтэй хүмүүст эмчилгээ хийсэн бол талийгаачийн хэрэглэсэн аппаратыг дамжуулж хэрэглэсэн иргэд халдвар авсан байж болзошгүй нөхцөл байдал үүсээд байгаа аж. 

Тус хэрэг 10-р сард гарсан ч өнөөдрийг хүртэл яг хэдэн хүн аппаратад орсон, хэдэн хүн халдвар авсан зэрэг тоон мэдээлэл нь тодорхойгүй байна. 

Энэ талаар Эрүүл мэндийн сайд Т.Мөнхсайхан “Цэргийн төв эмнэлэг БХЯ-ны харьяа. Гэхдээ ЭМЯ-ны салбарын хяналтын газраас шалгалт хийж эхэлсэн. Энэ халдвар хамгаалалтын дэглэм алдагдаж, бусад хүнд халдвар халдсан эрсдэл байгаа эсэхэд салбарын хяналтынхан ажиллаж байгаа. Үнэхээр тийм нөхцөл байдал үүсэн бол хаана хариуцлага алдсаныг тогтоож, хариуцлага тооцно” гэв.

Ташрамд, 1992 онд Монгол Улсад ДОХ-той хүний тохиолдол бүртгэгдсэн бөгөөд өнгөрсөн оны байдлаар 367 хүн ХДХВ-ийн халдвартай нь оношлогдож, үүнээс 63 нь нас бараад байгаа юм. Мөн нас барсан 63 хүний 35 нь ДОХ-ын шалтгаантай байгаа аж.