Нийслэлийн 2025 оны төсвийн төсөлд өгсөн аудитын дүгнэлтийг Нийслэл дэх төрийн аудитын газрын дэд дарга Ч.Болд танилцууллаа. 

Аудитын зүгээс Нийслэлийн 2021-2025 онд хөгжүүлэх 5 жилийн үндсэн чиглэл, Нийслэлийн Засаг дарга бөгөөд Улаанбаатар хотын Захирагчийн 2024-2028 оны үйл ажиллагааны хөтөлбөртэй нийцсэн ч нийслэлийн төсвийн зарлагыг 16.2 тэрбум төгрөгөөр бууруулах хэд хэдэн боломж байгааг дурдав. Үүнд: 

НЗДТГ-ын бусдаар гүйцэтгүүлэх ажил үйлчилгээний төлбөр хураамжийн зардалд төлөвлөлтийн шаардлага хангаагүй, тооцоо, судалгаагүй, нотлох баримтаар дэмжигдээгүй нийт 2.1 тэрбум төгрөгийн арга хэмжээг төлөвлөсөн байна. Тухайлбал,

• Нийслэлийн хэмжээний мөнгөн хөрөнгийн оновчтой удирдлагыг хэрэгжүүлэх, судалгаа хийх, зөвлөх үйлчилгээ үзүүлэх арга хэмжээнд 200 сая төгрөг, 
• Нийслэлийн үнэт цаасны болон өрийн удирдлагын журам боловсруулах, судалгаа хийх үйлчилгээ авахад 200 сая төгрөг,
• Ах, дүү найрамдалт харилцаат хотуудтай хамтран худалдаа, эдийн засгийн олон улсын арга хэмжээ, форум зохион байгуулахад 1.7 тэрбум төгрөг төсөвлөжээ.

Нийслэлийн 2025 оны хөгжлийн төлөвлөгөөг хэрэгжүүлэх арга хэмжээнд нотлох баримтаар дэмжигдээгүй, хэрэгцээ шаардлага тодорхойгүй, үйл ажиллагааны чиг үүрэг давхардсан арга хэмжээнд 3.5 тэрбум төгрөг төлөвлөсөн байна. Тухайлбал, 

• Соёлын эрхийн бичгийн туршилт, үйл ажиллагааг эхлүүлэхэд 100 сая төгрөг, 
• Төр хувийн хэвшлийн түншлэлийн хүрээнд төрөөс үзүүлэх зарим үйлчилгээг иргэний нийгмийн байгууллага, ТББ, хувийн хэвшлийн байгууллагаар гүйцэтгүүлэхэд 200 сая төгрөг,
• Бусад арга хэмжээний зардалд 2,9 тэрбум төгрөг, 
• Авлигатай тэмцэх үйл ажиллагаанд 200 сая төгрөг тусгасан.

1 удаагийн шинжтэй, тэвчиж болох, үр ашиггүй зардалд 1,6 тэрбум төгрөг төлөвлөсөн байна. Тухайлбал,

• Шинэ жилийн баярын цэнгүүн зохион байгуулахад 400 сая төгрөг, 
• Бүтээлч хот төслийг хэрэгжүүлэхэд 900 сая төгрөг,
• Өмгөөллийн хуулийн зөвлөгөө авахад 60 сая төгрөг,
• Хууль тогтоомжийн судалгаа хийхэд 40 сая төгрөг, 
• Эх оронч сурагч аян хэрэгжүүлэхэд 200 сая төгрөг төсөвлөжээ.

Нийслэлийн өмчийн үйлдвэрийн газруудын дүрмийн сангийн хөрөнгө гэх нэршилтэй 9 тэрбум төгрөг төсөвлөсөн нь нотлох баримтаар дэмжигдээгүй, нэршил, хуваарилалт, зориулалт тодорхойгүй байна. 

Мөн Шинэ Зуун мод корпорац ХХК, Нийслэлийн эрсдэлийн удирдлагын сан ХОС ТЗК-ийн дүрмийн санд нийт 7 тэрбум төгрөгийг төлөвлөсөн нь төрийн хэмнэлтийн тухай хуулийн 15.1, 15.1.1-тэй нийцэхгүй байна гэж үзэж байна. 

Түүнчлэн НИТХ-ын 2024 оны 105-р тогтоолоор "Эмээлт эко аж үйлдвэрийн парк" ХК-ийн дүрмийн санг 1.8 тэрбум төгрөгөөр нэмэгдүүлж баталсныг урсгал үйл ажиллагаанд зарцуулсан байна. Гэтэл Нийслэлийн 2025 оны төсвийн төсөлд хуулийн этгээдийн дүрмийн сангийн хөрөнгө нэршлээр туссан 12 тэрбум төгрөгийг урсгал зардалд зарцуулах эрсдэл үүсэж болзошгүй байна гэв.