Татварын багц хуулийн хэрэгжилттэй холбогдуулан УИХ-ын даргын 2024 оны 12  сарын 2-ны өдрийн 292-р захирамж гарсан. Ийнхүү татварын багц хуулийн хэрэгжилттэй танилцаж, санал дүгнэлт бэлтгэх, шаардлагатай бол холбогдох хуулийн төсөл боловсруулах Ажлын хэсэг байгуулагдаж, даргаар нь УИХ-ын гишүүн Х.Ганхуяг ажиллаж буй. Ажлын хэсэгт орсон УИХ-ын есөн гишүүн сүүлийн нэг сарын хугацаанд ажиллаж, 120 мянга орчим иргэн, ААН-ээс санал авчээ. 

Сүүлийн 5 жилд эдийн засаг хурдацтай өсөж, Татварын багц хуулийг дөрөв дэх удаагаа шинэчлэх асуудлыг ярилцаж буй. Хамгийн сүүлийн татварын багц хуулийн өөрчлөлтөөр И-Баримтын системийг нэвтрүүлж, НӨАТ-ын буцаан олголтыг олгож эхэлсэн юм.  

Хүчин төгөлдөр мөрдөгдөж буй татварын хуулийн хэрэгжилтэд дүн шинжилгээ хийн, олон улсын байгууллагуудын зөвлөмж, татвар төлөгчдийн саналд үндэслэн дараах асуудлуудыг татварын багц хуулийн шинэчлэлд тусгуулахаар Ажлын хэсэг шийдвэрлэжээ. Үүнд: 

1. НӨАТ-ын тухай хуульд шаталсан НӨАТ-ын тогтолцоог нэвтрүүлэх тухай тусгана. Иргэн бүр худалдан авалтынхаа эхний босго дүнгээр 100 хувийн буцаалтаа авдаг байх. Тухайлбал, амжиргааны доод түвшин буюу 500 мянган төгрөгийн эхний худалдан авалтын буцаалтыг 100 хувь буцаан авдаг байх. 500-800 мянган төгрөгийн худалдан авалтын 50 хувийг буцаан авах, 800 мянган төгрөгөөс дээш худалдан авалтад 20 хувийн буцаалтыг авдаг байх нь зүйтэй гэж үзлээ. 
2. ААН-үүдийн хувьд хуримтлалтай холбоотой асуудал үүсдэг тул НӨАТ-ын төлөлтийг хийхэд ААН-үүдэд тодорхой хугацаа өгөх шаардлагатай гэж үзжээ. Импортоор бараа авахад гаалийн татвар, НӨАТ урьдчилж давхар төлдөг. Тиймээс 2-3 сарын хугацаа өгч, НӨАТ өгдөг байх нь зүйтэй гэж үзсэн байна.
3. ХХОАТ-ын хуультай холбоотойгоор иргэдээс “НДШ, ХХОАТ нь иргэдийн нэрлэсэн цалингаас 30-46 хувиар суутгагддаг татвар авдаг” гэх гомдол санал ирсэн. Тиймээс ХХОАТ-ын дээд хэмжээг 10 хувиар тогтоох, шаталсан байдлаар хөнгөлөх саналыг Сангийн яамд хүргүүлнэ гэв.

Одоогийн хуулиар ААН-ын НӨАТ дээр ЖДҮ-г дэмжих зорилгоор 300 саяас 1 тэрбум төгрөгийн орлоготой ААН-үүд 1 хувийн татвар төлөх боломжтой байдаг. Үүнийг эдийн засаг, инфляцтай уялдуулж тодорхой хэмжээнд нэмэгдүүлэх асуудлыг тусгасан. Мөн 6 тэрбумаас дээш орлоготой ААН-үүдэд шатлалыг оновчтой тогтоох шаардлагатай байна. Учир нь мөн тооны орлоготой ААН-үүд 25 хувийн татвар оногддог учир компаниа задлах, хиймлээр үүсгэх тохиолдол гардаг аж.