УИХ-ын гишүүн Дав.Цогтбаатар нь 2016-2020 онд Хөгжлийн банкны Зээлийн хэлтсийн захирлаар ажиллаж байхдаа албан тушаалын байдлаа урвуулан ашиглаж, бусдад давуу байдал бий болгосон хэргээр гурван шатны шүүхээс ял авсан. Түүнийг уг хэрэгт гэм буруутай гэж үзэж, Эрүүгийн хуулийн 22.1-2 дахь хэсэгт заасны дагуу гэм буруутайд тооцож,

• нийтийн албанд томилогдох эрхийг нь хоёр жилээр хасаж,
• 20 сая төгрөгөөр торгох ял шийтгэсэн.

Ингэснээр түүнийг УИХ-ын гишүүнээс эгүүлэн татах нөхцөл бүрдсэн юм. Гэвч тэрээр өнөөдрийн хаврын чуулганы нээлтэд оролцсон ба энэ талаар УИХ-ын Ёс зүй, дэгийн байнгын хорооны дарга Б.Баярбаатар тодруулга өгчээ.

Тэрээр "УИХ Улсын дээд шүүхийн шийдвэрийг хэлэлцэх эрхгүй. Хууль, эрх зүйн хувьд Улсын дээд шүүх УИХ-д шийдвэрээ албажуулж, ирүүлэх үүргийг хүлээхгүй. УИХ бол энэхүү шийдвэрийг ямар процессоор, яах вэ гэдэг эрх зүйн зохицуулалт байхгүй байна. Үндсэн хуулийн 29-р зүйл дээр УИХ-ын гишүүн гэмт хэрэг үйлдсэн нь гурван шатны шүүхээр эцэслэн тогтоогдсон бол эгүүлэн татна гэж заасан. Харин УИХ-ын тухай хуулийн 9.1.5 дээр болохоор УИХ-ын гишүүн нь гэмт хэрэг үйлдсэн нь шүүхээр эцэслэн тогтоогдвол Төрийн байгуулалтын байнгын хорооны дүгнэлтийг үндэслэн УИХ тогтоол батална. Саналыг илээр хураана гэсэн байдаг. Өөрөөр хэлбэл, энэ талаар Үндсэн хуульд ерөнхий зааж өгөөд, УИХ-ын тухай хууль процесслоод заасан байгаа юм. Гэвч энэ хоёр нь зөрчилтэй.

Яагаад гэхээр УИХ-ын тухай хуулийн энэ заалтыг дагаж, Дээд шүүхийн шийдвэрийг хэлэлцэх нь Үндсэн хуулийн зөрчил рүү дагуулах эрсдэлтэй. УИХ-ын гишүүнийг 3 тохиолдолд чөлөөлдөг. 

1. Нас барсан тохиолдолд
2. Өөрөө чөлөөлөгдөх хүсэлтээ өгсөн тохиолдолд
3. Гэмт хэрэгт холбогдсон тохиолдолд

Эгүүлэн татаж байгаа тохиолдолд парламент УДШ-ийн шийдвэрийг хэлэлцэх эсэхийг хэлэлцэхгүй. Хоёрт, Дав.Цогтбаатар гишүүнийг эгүүлэн татах уу, үгүй юу гэдгийг бид хэлэлцэхгүй. Харин үг үсгийн найруулгын асуудлыг хэлэлцэх боломжтой. Хувь хүний байр сууриа илэрхийлэрхэд, энэ асуудлыг хэлэлцье гээд ороод ирвэл би ямар ч хэлэлцүүлэгт оролцохгүй. Үүнийг судалж үзэх шаардлагатай" гэлээ.