Шүүхийн ерөнхий зөвлөл өчигдөр (2025.03.19) хэвлэлийн бага хурал хийсэн байна. Энэ үеэр тодорхой асуудлаар сэтгүүлчдийн асуултад хариулжээ.

Тус байгууллага нь Шүүхийн тухай хуульд заасны дагуу шүүхийн бие даасан, шүүгчийн хараат байдал, хууль ёсны ашиг сонирхлыг хамгаалах чиг үүрэгтэй юм.

Хэвлэлийн бага хурлын үеэр Монгол Улсын Ерөнхий сайд Л.Оюун-Эрдэнэ энэ оны нэгдүгээр сарын 24-ний өдөр УИХ-ын намрын чуулганыг хаах үеэр тодорхой шүүх, шүүгчдийг хууль бус үйл ажиллагаа эрхэлдэг гэх агуулгатай үг хэлсэн асуудлыг хөндлөө. Энэ нь шүүхийн бие даасан, хараат бус байдалд нөлөөлөх оролдлого хэмээн олон нийт шүүмжилж байсан юм.

Тэгвэл энэ талаар Шүүхийн ерөнхий зөвлөл хуралдаанаараа авч хэлэлцэн, хуульд заасан арга хэмжээ авч, мэдэгдэл хүргүүлсэн хэмээн тус зөвлөлийн гишүүн А.Насандэлгэр мэдээллээ.

Ерөнхий сайдын хэлсэн үг нь шүүхэд итгэх иргэдийн итгэлийг бууруулах сөрөг үр дагавар бүхий агуулгатай байсан учраас хуулийн дагуу мэдэгдэл гаргасан хэмээн Шүүгчийн хараат бус байдал, шүүхийн аюулгүй байдлыг хангах газрын дарга Х.Билгүнзаяа тодруулсан юм.

Тус мэдэгдлийг Шүүхийн ерөнхий зөвлөл нэгдүгээр сарын 28-ны 00.05 цагт олон нийтэд нээлтэй байршуулсан байдаг.

Ташрамд дурдахад, Монгол Улсын Үндсэн хуульд Ерөнхийлөгч, Ерөнхий сайд, Улсын Их Хурлын ба Засгийн газрын гишүүн, төр, нам, олон нийтийн бусад байгууллагын албан тушаалтан, иргэн хэн боловч шүүгчээс шүүн таслах үүргээ хэрэгжүүлэхэд хөндлөнгөөс оролцож болохгүй хэмээн заасан байдаг.

Мөн сэтгүүлчид Хяналтын шатны шүүхийн шийдвэрээр УИХ-ын гишүүн Дав.Цогтбаатарыг Хөгжлийн банкны гэх хэрэгтэй холбогдуулан гэм буруутайд тооцон, хоёр жил нийтийн албанд томилогдох эрхээ хасуулах, 20 сая төгрөгөөр торгуулах ял шийтгүүлсэн ч биелэгдэхгүй байгаа талаар тодрууллаа.

ШЕЗ-ийн гишүүн А.Насандэлгэр "Шүүхийн шийдвэр заавал биелэгдэх ёстой. Хуулийн хувьд ямар маргаантай байгааг ШЕЗ тайлбарлах ёсгүй. Харин шүүхийн шийдвэр биелэгдэнэ гэсэн хуулийн заалт хэрэгжих ёстой" гэв.

Мөн холбогдох хууль тогтоомжуудад 4-5 жил тутам мониторинг хийдэг жишиг бий. Иймд энэ жилээс Шүүхийн тухай хуульд мониторинг хийж, асуудал байвал засаад явна хэмээн мэдэгдлээ.