Жил бүрийн 3 сарын 20-ны өдрийг НҮБ-аас “Дэлхийн аз жаргалын өдөр” болгохыг уриалж, 2013 оноос эхлэн тэмдэглэж байна. Ард иргэдийн аз жаргалтай эсэхийг судалдаг олон үзүүлэлт, хүчин зүйл байдгаас хамгийн түгээмэл нь “аз жаргалын индекс”-ийн үзүүлэлт юм. 

Энэхүү үзүүлэлтээр Финланд улс 8 дахь жилдээ дэлхийн хамгийн аз жаргалтай улсаар тодорч байгаа бол Дани, Исланд, Норвеги, Швед улс эхний 10-т багтжээ. Жагсаалтад тэргүүлж буй Нордикийн орнуудыг гайхах зүйлгүй гэж Gallup компанийн захирал Илана Рон Леви хэлсэн юм. Мөн тэрээр "Дэлхий нийт Финланд юугаараа онцлог гэдэгт анхаарлаа төвлөрүүлж байгаа гэж би бодож байна" тэд бусад хүмүүсээс илүү аз жаргалтай байдаг шалтгаан нь "бусдад итгэх итгэл", ирээдүйгээ өөдрөгөөр харах, найз нөхөд, гэр бүлийнхний дэмжлэг зэргийг дурджээ.

Аз жаргалын индекс нь улс орнуудыг дундаж амьдрал, Gallup World Poll-ийн Cantril шатны асуултын хариултаар үнэлдэг. Энэхүү индексийг нийтэлдэг Оксфордын их сургуулийн Эрүүл мэндийн судалгааны төвөөс мэдээлснээр энэ тайланд Cantril шатны асуултаас гадна нэг хүнд ногдох ДНБ, нийгмийн дэмжлэг, эрүүл дундаж наслалт, эрх чөлөө, өгөөмөр байдал, авлигын эрх чөлөө зэргээр үнэлдэг байна.

АНУ эхний 10-т багтаж чадаагүй бөгөөд 23-р байрнаас 24-т орж унасан байна. Харин Коста Рика, Мексик хоёр анх удаа эхний 10-т орсон нь хүмүүсийг аз жаргалтай байлгахын тулд дэлхийн хамгийн баян орнуудын нэг байх шаардлагагүй хэмээн Рон Леви хэлсэн юм.  

Манай улсын хувьд аз жаргалын индексийн 2025 оны үзүүлэлтээр 147 орноос 77 дугаарт бичигдэж, өмнөх оны эрэмбээ хадгалсан юм. Манай улсын оноо 5.833 байсан нь өмнөх оныхоос ялимгүй дээшилсэн үзүүлэлт юм. Гэвч эрэмбийн хувьд өмнөх оныхоос өөрчлөлтгүй байж, Киргиз, Доминикан улсын дараа жагслаа. 10 жилийн өмнө 100-аас хойш жагсаж байсан Монгол Улсын эрэмбэ сүүлийн жилүүдэд харьцангуй сайжирсан ч 2024 онд эрс доошлон 61-77 руу ухарч байсан юм. 

Хойд Европын орнууд итгэлцэл, өгөөмөр сэтгэлийн үзүүлэлтээр эрэмбэд мөн л тэргүүлсэн бол Монгол Улс танихгүй хүнд туслах үзүүлэлтээр 132 дугаарт, гээсэн түрийвчийг танихгүй хүн эргүүлэн өгөх магадлалаар 102 дугаарт жагсжээ.