Бөөр шилжүүлэн суулгах үндэсний баг болон донор хүлээж буй өвчтөнүүдийн төлөөлөл мэдээлэл хийлээ. 

Бөөр шилжүүлэн суулгах үндэсний багийн ахлагч М.Эрдэнэсайхан: Бөөр шилжүүлэн суулгах үндэсний баг 2008 онд анх тархины үхэлтэй донороос бөөр шилжүүлэн суулгах мэс заслыг амжилттай хийж байсан. Задалбал, 2008 онд 2 удаа, 2009 онд 2 удаа гэх мэтээр явж байгаад 2019 онд 11 удаа, 2020 онд 6 удаа, 2021 онд 8 удаа, 2022 онд 4 удаа, 2024 онд 10 удаа. Ийнхүү нийтдээ 57 хүнд тархины үхэлтэй донороос бөөр шилжүүлэн суулгасан байна. Энэ 57 хүн одоо эрүүл, энх тунх амьдарч байна. 

Үндэсний багийн зөвлөх эмч Д.Нямсүрэн: Яг одоогийн байдлаар амьгүй донор хүлээж байгаа 700 орчим хүн байна. Бөөр шилжүүлэн суулгах хагалгаа бол монголын хөрсөнд бүрэн дүүрэн суусан. П.Батчулуун эмчийн хувьд бөөр шилжүүлэн суулгах үйл ажиллагаанд онцгой хувь нэмэр оруулсан, энэ талаар мэргэшсэн эмч юм. Түүний гавьяа, хөдөлмөрийг үнэлэхийн аргагүй. П.Батчулуун эмчийг ял авсанд бидний хувьд харамсмаар байна. Цаашид Улсын дээд шүүхээс түүнийг цагаадна гэж найдаж байна. 

Гавьяат эмч Л.Жамбалжав: Эрхтэн шилжүүлэх мэс заслын хамгийн эхний ажил бол амьгүй донорыг хайж олох байдаг. Ингээд олсон хүнээс эрхтэнийг авах, эрхтэнийг суулгах, мэс засалд орсны дараа хянах гээд бүхэл бүтэн цогц багийн ажил юм. Хэдэн жилийн өмнөөс эрхтэн шилжүүлэх ажлыг зохион байгуулалтад оруулъя, ажиллаж буй олон багийг уялдаатай болгоё гэж Эрүүл мэндийн хөгжлийн төвийн дэргэд агентлаг байгуулсан юм. Тус агентлагийг П.Батчулуун эмч ахалж байсан. Өөрөөр хэлбэл, донор олж өгдөг, зохицуулалт хийдэг П.Батчулуун эмчийн баг нь хагалгаа хийж байгаа багтай ямар ч хамаа байхгүй. Ийм ажил хийж байсан маш сайн залуу эмч юм. Амьгүй донороос ямар ямар эрхтэн, эд авах вэ гэдэг баримт дээр эмч нар гарын үсэг зурдаг. Уг баримтад элэг, бөөр, шөрмөс гэж зааж өгөөд ар гэрээс нь 3 хүн гарын үсэг зурсан. Ингээд багууд элэг, бөөр, шөрмөсийг шилжүүлэн суулгасан. Бидний хувьд П.Батчулуун эмчийг буруугүй гэж бодож байна. Одоогийн байдлаар П.Батчулуун эмчийг хүний эд эрхтэн зөвшөөрөлгүй авсан мэтээр ойлгож байна. Үнэндээ энэ зөвшөөрлийг авсан хүн нь П.Батчулуун эмч биш. Эрхтэнийг нь сугалж авсан хүн ч биш. Ийм учраас ялгаж салгах хэрэгтэй.

Нөгөө талаас П.Батчулуун эмчийн биеийн байдал тааруу байна. Зүрхний судсаар нь цус гүйхгүй битүүрдэг байсан учраас 6 судсанд гуурс хийсэн. Хоригдсоноос хойш бас хэдэн судсанд гуурс тавьсан гэсэн. Түүний биеийн хувьд зүрхний үхжил болох эрсдэл өндөр бий. Ийм хүнд нөхцөл шүүх хурлаас өмнө чөлөөлөөсэй гэж Монголын нийт эмч нар гуйж байна. Тэр хүний асуудал түр шийдэгдтэл эрүүл мэндийг нь бодоод түр гаргачхад нийгэмд ямар ч хохирол учруулахгүй шүү дээ гэлээ.