Хүний эрхийн үндэсний комисс Монгол Улс дахь хүний эрх, эрх чөлөөний байдлын талаарх 24 дэх илтгэлийг сэтгүүлчдэд танилцуулж байна.

Энэ үеэр ХЭҮК-ын дарга Д.Сүнжид “Яагаад хэвлэлийн эрх чөлөөг НҮБ, олон улсын байгууллагууд анхаарч, зөвлөмж, дүгнэлт гаргадаг вэ гэхээр ардчиллын суурь зарчим болсон хүний мэдэх эрхтэй холбоотой. Манай улс жил бүр хэвлэлийн эрх чөлөөний индексээр ухарч байна. Жилийн дотор 20, дөрвөн жилийн дотор 40 байр ухарчихаад яаж өөрсдийгөө ардчиллын баянбүрд гэж хэлэх вэ” хэмээв.

“Хил хязгааргүй сэтгүүлчид" олон улсын байгууллагаас жил бүр гаргадаг "Дэлхийн хэвлэлийн эрх чөлөөний индекс"-ийн 2023 оны тайланд Монгол Улсын хэвлэлийн эрх чөлөө 70-аас бага оноотой буюу "асуудалтай" гэж дүгнэсэн байдаг.

Тэгвэл 2024 онд 51.34 оноогоор "муу" гэж дүгнэсэн байна. Улмаар 180 орноос 109-т эрэмбэлэгджээ.

Тус байгууллагаас энэхүү дүгнэлтэд нөлөөлөх хүчин зүйлийг улс төрийн нөхцөл, эдийн засаг, эрх зүйн асуудал, нийгэм, соёлын нөхцөл байдал, сэтгүүлчийн эсрэг хүчирхийлэл хэмээн үзсэн байна.

Манай улсад худал мэдээлэл тараах, нэр төрд халдахтай холбоотой 10 гомдол мэдээллийн 8 нь сэтгүүлчтэй холбоотой байна хэмээн танилцуулгын үеэр дурдлаа.

Харин шүүхээр хянан хэлэлцэж буй хэрэг харьцангуй бага байгаа нь сэтгүүлчтэй холбоотой хэрэг бүртгэл нээж, хүндрэл чирэгдэл учруулж байгаад хаачихдаг, энэ нь дарамт учруулдаг гэх дүгнэлтэд хүргэж байгаа юм.

Энэ талаар ХЭХХ-ийн дарга З.Өнөржаргал “Сэтгүүлч мэргэжлийн үйл ажиллагаа эрхлэх хүрээнд хянаж цагдуулахгүй байх, эх сурвалжаа хамгаалах тухай үндэсний бодлогодоо суулгахгүй бол олон улсад хүний эрх, ардчиллын үзүүлэлтээр дандаа ухарсан байна. Энэ талаар Нидерланд улсын сайн туршлага бий. Бид тайлан, зөвлөмждөө тусгасан” хэмээв.

Шаардлагатай хууль, журамд өөрчлөлт оруулах холбогдох ажлын хэсэгт орж, шат шатны байгууллагад оролцоотой байгаа талаар ХЭҮК-ын дарга цохон тэмдэглэлээ. Мөн тэд тайлангаа бүрэн эхээр нь олон нийтэд байршуулах аж.