Хүчирхийллийн эсрэг үндэсний төв нь сүүлийн 30 жилийн турш тасралтгүй эмэгтэйчүүд, хүүхдийн эсрэг үйлдэгдэж буй гэр бүлийн хүчирхийлэл, бэлгийн хүчирхийллийг арилгах зорилгоор байгуулагдан үйл ажиллагаагаа тогтвортой явуулж байгаа билээ. Тус төв нь нийслэлийн хэмжээнд үйл ажиллагаа явуулдаг бөгөөд ашгийн бус, аливаа нам, улс төрийн хүчнээс хараат бус, нийгэмд үйлчилдэг Төрийн бус байгууллага.

Хуулийн хүрээнд уг төвийн санхүүжилтийг халамжаас олгодог байсан ч Гэр бүлийн тухай хууль шинэчлэгдэж, тухайн орон нутгаас санхүүждэг болсон байна. Ийнхүү тэд хуулийн дагуу санхүүжилт авах хүсэлтээ нийслэлийн Засаг даргын тамгын газарт хүргүүлсэн ч санхүүжилтийг өгөх боломжгүйгээ НЗДТГ мэдэгджээ. Уг байгууллага нь жилдээ 200 гаруй сая төгрөгийн зардалтай бөгөөд энэхүү мөнгө нь эмэгтэйчүүд, хүүхдийг хамгаалах байранд ажиллаж буй 8 хүний цалин болон цахилгаан, ус гэх мэт урсгал зардалд зарцуулагддаг байна. Түүнчлэн бэлгийн болон гэр бүлийн хүчирхийлэлд өртсөн хохирогчдыг хамгаалах хүрээнд сэтгэл зүйч, хуульчаас зөвлөгөө авахад тухайн мөнгө зарцуулагддаг гэнэ. 

Тус төв нь ийнхүү энэ онд санхүүжилтгүй болсон бөгөөд Хүүхэд, гэр бүлийн хөгжил, хамгааллын ерөнхий газарт уг асуудлыг тавихад төсвөө дүүрэг, орон нутаг руу хуваарилсан тул дүүрэгтээ хандахыг зөвлөсөн байна. Ингээд тухайн үйл ажиллагаа явуулдаг Баянгол дүүрэгт хандахад уг нь төсөв байгаа ч Хүчирхийллийн эсрэг төв нь дүүргийн хэмжээнд бус нийслэлийн хэмжээнд ажилладаг тул санхүүжүүлэх боломжгүй гэдэг хариуг өгчээ. Ийнхүү эцэст нь НЗДТГ руу өнгөрсөн оны 11 сард болон 2-р сард хандахад НЗДТГ ийнхүү боломжгүй гэдэг хариуг өгөөд байгаа юм.

Хүчирхийллийн эсрэг үндэсний төвөөс жилдээ 150 гэр бүлийн болон бэлгийн хүчирхийлэлд өртсөн хүүхэд, эмэгтэйчүүд үйлчилгээ авдаг. Яг одоогийн байдлаар тус төвд 10 гаруй хүн байгаа бөгөөд 4 нь л гэхэд бэлгийн хүчирхийлэлд өртсөн хүүхэд байна. 

Мэдээллийг бүтнээр нь эндээс үзнэ үү.