BBC - Энэтхэгийн баруун хэсэгт орших Ахмедабад нисэх онгоцны буудлаас  Лондонгийн Гатвик чиглэлийн 171-р нислэг хөөрснөөсөө хойш удалгүй осолдож орон сууцны хороолол руу унасан осол гарсан. Бямба гарагт доктор Дхавал Гамети 270 хохирогчийн цогцсыг эмнэлэг хүлээн авсан гэж мэдэгдсэн юм. Тэдгээрийн 241 нь AI171 нислэгийн зорчигч болон багийн гишүүд гэж таамаглаж байна.

Ням гарагт Лондон дахь Энэтхэгийн дээд комиссын үүдэнд 100 орчим хүн цугларч, ослоор амь үрэгдэгсдийн дурсгалыг хүндэтгэн зул өргөсөн бол Энэтхэг, Их Британи даяар нас барагсдын хүндэтгэлийн жагсаал болжээ.

Энэтхэгийн Онгоцны ослын мөрдөн байцаах товчоо (AAIB) ослын шалтгааныг тодруулах мөрдөн байцаалтыг удирдаж, АНУ, Их Британийн багуудын туслалцаатайгаар ажиллаж байгаа юм. Баасан гарагт осолдсон газраас хар хайрцаг олдсон бөгөөд Энэтхэгийн Иргэний нисэхийн сайд Рам Мохан Найду Кинжарапу гамшгийн талаар "мөрдөн байцаалт явуулахад чухал ач холбогдолтой" гэж мэдэгдсэн.

Flightradar24 сайтын мэдээлснээр Boeing Dreamliner 787-8 онгоц 11 настай байсан бөгөөд сүүлийн хоёр жилийн хугацаанд Ахмедабадаас Лондон Гатвик чиглэлд 25 нислэг үйлджээ.

Энэтхэгийн Ерөнхий сайд Нарендра Моди баасан гарагт онгоцны ослын газрыг тойрон 20 минут орчим алхжээ. Тэрээр мөн гамшигт өртсөн зарим хүмүүс, тэр дундаа онгоцноос амьд үлдсэн цорын ганц хүн болох Вишвашкумар Рамештай уулзахаар эмнэлэгт очиж, "бүх ард түмэн түүнийг хурдан эдгэрэхийн төлөө залбирч байна" гэж мэдэгдэв.