УИХ дахь АН-ын бүлгийн даргаар Б.Түвшин сонгогдлоо. Түүний хувьд ХХБ, Эрэл, АПУ, Миг даатгал зэрэг үндэсний томоохон компаниудад ажиллаж байсан туршлагатай. Хамгийн сүүлд Миг даатгал ХХК-ийн Ерөнхий захирал хийж байгаад гишүүн болжээ. Тэгвэл түүний эзэмшдэг компани, хөрөнгийн хэмжээтэй танилцъя.

УИХ-ын гишүүн Б.Түвшингийн нийт хөрөнгийн хэмжээ 2024 онд 32.1 тэрбум байсан бол 2025 онд 33 тэрбум болж нэмэгджээ. Энэ нь түүний бэлнээр эзэмшиж буй мөнгө биш. Түүний үл хөдлөх хөрөнгө, компани, хувьцаа, зээл гээд бүх хөрөнгө үүнд хамаарна. Задлаад харвал, 

• Өөрийн орлого жилийн 2 орчим тэрбум,
• Гэр бүлийн орлого жилийн 1 гаруй тэрбум,
• Хөрөнгө борлуулсны орлого 1.4 гаруй тэрбум, 
• Нийт үл хөдлөх хөрөнгө нь 21.2 тэрбум, 
• Тээврийн хэрэгсэл 1 тэрбум,
• Газар нь 66 сая, 
• Хадгаламж 2 орчим тэрбум,
• Авлага 362 сая, 
• Мөн тэрээр 4.6 орчим тэрбум төгрөгийн зээлтэй байна.

Үүнээс гадна тэрээр санхүүгийн маш олон компанийн эцсийн өмчлөгч байгаад зогсохгүй хувь эзэмшигч юм байна. Тэрээр 

• Хубилай лайф ХХК-ийн 100 хувийн эзэмшигч,
• Хас хаан ББСБ-ын 41 хувийн эзэмшигч,
• Миг ХХК-ийн 61 хувийн эзэмшигч, 
• ТиСиЭс глобал ХХК-ийн 45 хувийн эзэмшигч юм байна.

Мөн нээлттэй хувьцаагаа арилждаг АПУ, Хаан банк, Монголын үнэт цаасны бирж, Монголын хөрөнгийн бирж, М банк, Би Ди Сек ҮЦК зэрэг ХК-д хувьцаа эзэмшдэг гэж АТГ-т мэдүүлжээ.