Дорнод аймгийн Халх гол сумын нутаг Нөмрөгийн дархан цаазат газарт 10 дугаар сарын 8-ны өдөр хээрийн түймэр гарсан харамсалтай хэрэг гарсан билээ. Түймэрт тусгай хамгаалалттай газар нутгийн 79.8 хувь нь шатсаныг урьдчилсан байдлаар тогтоосон бөгөөд 8 хоногийн дараа бүрэн унтраажээ.

Урьдчилсан дүнгээр нийт 528,765.5 га талбай түймэрт өртсөнөөс 468,965.7 га нь Нөмрөгийн дархан цаазат газрын нутаг дэвсгэр байжээ. 

Монголын зүүн хязгаарын үзэсгэлэнт нутаг болох  энэхүү дархан цаазат газрын талаарх мэдээллийг хүргэж байна. 

• Хянганы экосистем, Манжуурын гаралтай ан амьтан, дэлхийд ховордсон биологийн төрөл зүйл, онгон зэлүүд байгалийг хамгаалах зорилгоор 1992 онд улсын тусгай хамгаалалтанд авч УИХ-ын 1995 оны 26-р тогтоолоор “дархан цаазат газар” болгожээ. 
• Нөмрөгийн ДЦГ-т дундаж өндөр нь д.т.д 1500 метрээс дээшгүй бөмбөгөр оройтой бэсрэг уулс олон байдгийн хамгийн өндөр нь 1504 метр өндөр Соёлз уул юм. 

Монгол орны өөр хаана ч байдаггүй уур амьсгалтай 

• Нөмрөгийн ДЦГ нь Монгол орны уур амьсгалын мужлалаар чийглэгдүү сэрүүвтэр зунтай, хахирдуу өвөлтэй уур амьсгалын мужид багтдаг. Уур амьсгалын энэ нөхцөл нь Монголд өөр хаана ч байхгүй бөгөөд Нөмрөгийн энэ онцлог нь Номхон далайн муссоны нөлөөтэй шууд холбоотой хэмээн үздэг. 
• Ихэнх өдөр үүлгүй, нарны гийгүүлэх хугацаа жилд дунджаар 2800-2900 цаг буюу өдөрт 8 цаг орчим байдаг. 

Монгол орны өөр хаана ч ургадаггүй 57 зүйл ургамал ургадаг 

• Нөмрөгийн ДЦГ-т 69 овгийн 493 зүйл гуурст ургамал бүртгэгдсэн. Унаган 1, завсрын унаган 10, эмийн 41, ашигт 29, нэн ховор 15, ховор 21 ургамал ургадаг. Энэ тойргоос өөр газарт ургадаггүй 57 зүйл ургамал байх агаад тэдгээр нь уг тойргийн үндсэн төрхийг илэрхийлдэг. 
• Тус бүсээс өөр хаана ч байхгүй гэгдэх Валерийн тарна ургаж, цагаан цээнэ, их саадган цэцэг, бавгар үрт агчаахай зэрэг нэн ховор ургамлын зүйлүүд тохиолддог. 

Монгол орны өөр хаана ч байдаггүй монгол хясаа, дагуурын сувдан хясаа тархсан

• Нөмрөгийн ДЦГ-т 251 зүйл шувуу, 46 зүйл хөхтөн, 5 зүйл хэвлээр явагч, 5 зүйл мөлхөгч, 24 зүйл загас бүртгэгдсэн байна.  Дагуурын зараа, евроазийн халиу зэрэг Улаан номонд бүртгэгдсэн ховор амьтад болон Монголын өөр хаана ч байдаггүй Дагуурын зараа  бий. 
• Нөмрөгийн ДЦГ-т загасны бүртгэл нарийн хийгдээгүй ч Буйр нуур хүртэлх Халхголын ай савд нуурын варлан, лаговскийн варлан, давжаа сугас, морин гүрц, цагаан сэлүүрт гүрц, улаан далбаа, халбаган загас зэрэг 24 зүйл бүртгэгдсэн.  
• Нөмрөгийн дархан цаазат газарт Монгол орны өөр хаана ч байхгүй монгол хясаа, дагуурын сувдан хясаа тархан байдаг. 

Эх сурвалж: Guide