УИХ дахь ХҮН намын зөвлөл Төрөөс мөнгөний бодлогын талаар 2027 онд баримтлах үндсэн чиглэлийн төсөлд байр сууриа илэрхийллээ. 

Монголбанк “Төрөөс мөнгөний бодлогын талаар 2027 онд баримтлах үндсэн чиглэл”-ийн төслийг боловсруулж, УИХ-д өргөн бариад буй. Уг төсөлд үнийн тогтвортой байдлыг хангах болон банкны салбарын тогтвортой байдлыг хангах хүрээнд 2 бүлэг, 17 арга хэмжээ авахаар тусгасан. Мөнгөний бодлогын баримтлах үндсэн чиглэлд Төв банкны хараат бус байдлыг нэмэгдүүлж, төсөв, мөнгөний бодлогын зохистой уялдааг бий болгож, үнийн тогтвортой байдлыг хангахыг тусгасан юм. 

Энэ талаар УИХ-ын гишүүн, Хүн намын зөвлөлийн дарга П.Ганзориг:

• Энэ удаагийн мөнгөний бодлогын үндсэн чиглэл нь өнгөрсөн 10 гаруй жилд Монголбанкны гаргасан алдааг засаж, залруулсан байдлаар оруулж ирсэн нь сайшаалтай. Тухайлбал, өнгөрсөн хугацаанд Монголбанк маш олон удаа үнэ тогтворжуулах хөтөлбөрүүд хэрэгжүүлж ирсэн бөгөөд үүний үр дүнд Монголбанкны алдагдал өнөөдөр 6.9 их наяд төгрөгт хүрч, хөрөнгийн дутагдал нь 4.8 их наяд байна. Өнгөрсөн 10 гаруй жилийн хугацаанд Монголбанкнаас нийт 15 их наядын үнэ тогтворжуулах хөтөлбөр хэрэгжүүлсэн байна. Мөн Төв банкны хараат бус байдлыг нэмэгдүүлэхийг үндсэн чиглэлдээ тусгасныг Хүн намын зөвлөлөөс дэмжиж байна. 

УИХ-ын гишүүн, Хүн намын зөвлөлийн гишүүн Б.Мөнхсоёл:

• Төв банк бие даасан бусаар ажиллах нь эдийн засагт сөргөөр нөлөөлдөг. Өнөөдрийн 12.9 хувь хүрсэн инфляц 11 дүгээр сарын сүүлээр 15 хувьд хүрэх магадлалтай гэж харж байна. Хамгийн гол нь Монголбанкны хуримтлагдсан 6.9 их наядын алдагдлыг хэрхэн нөхөх вэ гэдэг бидний толгойны өвчин болоод байна. Монголбанкны зүгээс Засгийн газраар нөхүүлэх санал гаргасан байсан. Гэхдээ алдагдал яагаад 6.9 их наяд болсныг мэдэхийн тулд аль Засгийн газрын үед, юунд зарцуулсан гэдгийг тодорхой болгох хэрэгтэй байна. 

УИХ-ын гишүүн, Хүн намын зөвлөлийн гишүүн Д.Наранбаяр:

• Монголбанкны тогтоож байгаа бодлогын хүү инфлцтайгаа тэмцэж чадахаа байчихсан дүр зураг харагдаж байна. Монголбанк өрөндөө баригдаж, өтөндөө идэгдсэн юм шиг болчихсон. Хуримтлагдсан алдагдал нь 6.9 их наяд төгрөг. Өөрийн хөрөнгийн дутагдал нь 4.8 их наяд. Монголбанк энэ удаад энэ их алдагдлаа барьж орж ирж байгааг нь манай намын зөвлөл өндрөөр үнэлж байна. Гэхдээ энэ их алдагдлыг Засгийн газраар бонд гаргаж үүрүүлэх саналыг дутагдалтай гэж үзэж байна. Ипотекийн зээлийг Төв банкнаасаа санхүүжүүлдэг улс дэлхийн өөр хаана ч байхгүй. Нийт 11 их наядын 8.2 их наядыг нь Монголбанк дангаараа бүрдүүлсэн байна. Засгийн газрын элдэв хөтөлбөрт мөнгөө зарцуулж ирсний гор нь өнөөдөр гарч ирж байна. Цаашид Монголбанкыг эрүүл тогтолцоотой болгох тал дээр хамтарч мөнгөний бодлогын үндсэн чиглэлийг дэмжиж ажиллах болно.