Нүүрсний хулгай гэх асуудал дэгдэх үед АТГ-аас 17 албан тушаалтныг олон нийтэд ил тодоор зарлан сэжигтнээр татаж, шалгаж эхэлсэн.  44 их наядын хулгай гарсан “Нүүрсний” гэх хэрэгт тухайн үедээ олон хүн холбогдож байсан ч 17 хүний нэрийг ил тодоор зарласан учир нь тэр 17 хүн төрийн өндөр албан тушаалтан байсан юм. Тэдний 17 сэжигтнээс одоо 3 нь УИХ-ын гишүүн болжээ. 

Нийтлэлийг зургаар үзээрэй. 

1. Ерөнхийлөгч асан Х.Баттулга 

Тэрээр 2024 оны УИХ-ын ээлжит сонгуулиар 4-р тойрог буюу Булган, Хөвсгөл, Орхон аймгаас сонгогдож, УИХ-ын гишүүн болсон. Хэрэг нь хаагдсан уу, шалгагдаж байгаа юу гэдэг нь тодорхойгүй бөгөөд шүүх рүү шилжсэн мэдээлэл байхгүй байна.

2. ЕТГ-ын дарга асан Ө.Шижир

Тэрээр 2024 оны УИХ-ын ээлжит сонгуулиар Ардчилсан намын жагсаалтын тавдугаар бичигдэн, УИХ-ын гишүүн болсон. Хэрэг нь хаагдсан уу, шалгагдаж байгаа юу гэдэг нь тодорхойгүй бөгөөд шүүх рүү шилжсэн мэдээлэл байхгүй байна.

3. Өмнөговь аймгийн Засаг дарга асан Р.Сэддорж

Тэрээр 2024 оны УИХ-ын ээлжит сонгуулиар Ардчилсан намаас сонгуулийн 7-р тойрог буюу Өмнөговь, Дорноговь, Говьсүмбэр, Дундговь аймагт нэр дэвшиж, УИХ-ын гишүүн болсон. Үүгээр зогсохгүй, УИХ-ын Эдийн засгийн байнгын хорооны дарга болжээ. Хэрэг нь хаагдсан уу, шалгагдаж байгаа юу гэдэг нь тодорхойгүй бөгөөд шүүх рүү шилжсэн мэдээлэл байхгүй байна.

Тэд бүрэн эрхээр халхлагдав уу?

• УИХ-ын гишүүнийг албадан саатуулах, баривчлах, цагдан хорих, түүнд шүүхийн журмаар Зөрчлийн тухай хуульд заасан хариуцлага оногдуулах, гэр, албан өрөө, тээврийн хэрэгсэл, биед нь үзлэг, нэгжлэг хийхийг хориглодог. Үүнийг хуульд УИХ-ын гишүүний халдашгүй байдал, бүрэн эрхийн асуудал гэж үзнэ.
• Хэдийгээр энэ нь тухайн УИХ-ын гишүүнийг аливаа хэрэгт татан шалгаж болохгүй гэсэн үг биш ч мөрдөн шалгах ажиллагаанд тодорхой хэмжээний саад учрах эрсдэлийг нэмэгдүүлдэг.
• Тиймээс УИХ-ын гишүүнийг аливаа хэрэгт татан шалгах үед халдашгүй байдалтай холбоотой саад учирвал бүрэн эрхийг нь УИХ-аар түдгэлзүүлсний дараа шалгадаг. УИХ-аас түдгэлзүүлээгүй тохиолдолд үргэлжлүүлэн шалгах боломжгүйд хүрдэг билээ.
• Тэгвэл дээрх гурван гишүүнийг нүүрсний гэх хэрэгт шалгаж дуусаагүй тохиолдолд УИХ-ын гишүүний халдашгүй байдал, бүрэн эрхийн хүрээнд бүрэн дүүрэн шалгах боломжгүй болох эрсдэлтэй байгаа юм.