Нисванис хамтлаг байгуулагдсан цагаасаа хойш 28 жилийн хугацаанд сонсогчдодоо “Хүчилтөрөгч”, “Саарал үе”, “Нисдэг таваг”, “Гар хангалга” хэмээх дөрвөн цомгийг сонордуулсан билээ. Ийнхүү тэд 2022 онд Яруу найрагч Б.Галсансүхтэй хамтран “Галсансүхийн Нисванис” хэмээх пянз гаргасан. Уг пянзыг Япон улсад хэвлүүлж, Яруу найрагч Б.Галсансүхийн 21 шүлэг, “Нисванис” хамтлагийн 11 дуу оруулсан байдаг. 

Тэгвэл Нисванис хамтлаг энэ удаад бие даан “Саарал үе”, “Гар хангалга” хэмээх хоёр цомгоо пянз болгон сонсогчдодоо өргөн барьж байна. Эдгээр цомог нь тус хамтлагийн бие даан гаргаж буй анхны пянз болоод зогсохгүй, “Саарал үе” цомог нь дабль байдлаар хэвлэгдсэн байна. Мөн тэд Монголдоо анх удаа хоёр цомгоо зэрэг пянз болгон хэвлүүлсэн хамтлаг болж буй аж. 

Нисванис хамтлаг энэхүү пянзны баяраа аравдугаар сарын 19-ний өдөр The Corporate Hotel and Convention Centre-д хийнэ. Пянзны баярт The Lemons, A-Sound, Galtmah хамтлагууд оролцох бөгөөд тасалбарыг ZUGA аппликэйшнээр худалдан авах боломжтой.