УИХ-ын гишүүн Д.Энхтүвшин, Ж.Баярмаа, Г.Тэмүүлэн, Б.Түвшин нар төсвийн зардлыг 3.6 их наядаар бууруулах шаардлагыг Засгийн газарт хүргүүллээ. 

Тодруулбал, энэ 4 гишүүн төсвийн зардал дахь үргүй зардлуудыг тооцож үзээд, 3.6 их наядаар бууруулах боломжтой гэж үзсэн байна. Төсвийн урсгал зардалд байгаа үргүй зардлыг УИХ-ын гишүүн Ж.Баярмаа танилцуулав. 

• Томилолт, зочны зардал 111 тэрбум төгрөг болсон байгаа нь 2024 буюу энэ жилийн төсвөөс 4 дахин нэмэгдсэн дүн юм. 
• Тавилга, эд хогшил, урсгал засварын зардал 267 тэрбум. Энэ нь 2 дахин нэмэгдсэн дүн аж. 
• Мэдээлэл, технологийн үйлчилгээний зардалд 70 тэрбум төгрөг. Энэ нь 3.6 дахин нэмэгдсэн дүн байна. Төрийн байгууллагууд нь энэ чиглэлийн алба, хэлтэстэй байдаг. 
• Бусдаар гүйцэтгүүлсэн ажлын төлбөрт 1.9 их наяд. Өөрөөр хэлбэл, өмнөх оныхоос 2.5 дахин нэмэгдсэн. Үүний ард ямар ажил хийгдэх нь тодорхойгүй байгаа аж. 
• Бараа үйлчилгээний зардалд 960 тэрбум төгрөг. Гэтэл 2023 оны төсвийн гүйцэтгэлийн аудитын дүгнэлтэд 74 тэрбум төгрөгийн илүү бараа авсан байгааг бичсэн байсан. 

Тэрээр "Энэ зардлууд нь хотод, төрийн захиргааны төв байгууллага буюу яамдын төсөвт тусгасан байгаа юм. Тэгсэн мөртлөө хөдөө орон нутагт нэг ч шинэ хөрөнгө оруулалт, тавилга тоног төхөөрөмж тусгаагүй байна. Өөрөөр хэлбэл, хөдөө нэг ч цэцэрлэг сургууль барихгүй мөртлөө энэ мэт зардлуудыг төвд тусгасан нь шударга бус гэж үзэж байна" гэлээ. 

Мөн УИХ-ын гишүүн Г.Тэмүүлэн "Бид тооцож үзэхэд төсвийг 3.6 их наядаар танах боломжтой байна. Төсвийн урсгал зардлыг 3.6 их наядаар тэлэхэд инфляцад 1.5 хувийн нөлөө үзүүлнэ. Нөгөө л бидний ярьдаг хүндрэлүүдийг авчирна, төгрөгийн ханш суларна" гэсэн юм.

Тэд ийнхүү УИХ, Засгийн газар төсвөө дахин хэлэлцэхэд анхаарахыг шаардаж байгаа аж.