Хэвлэл мэдээллийн салбарт ажиллаж буй хэн бүхэн төдийгүй сэтгүүл зүй сонирхогчид, чөлөөт бичигч, оюутан залууст зориулсан нээлттэй хэлэлцүүлгийн талбар “The Media Show 2024” арга хэмжээ 11 дүгээр сарын 16-нд болох гэж байна. Өнгөрсөн жил “The Media Show - Demo” арга хэмжээг анх удаа цомхон, цөөн оролцогчидтой зохион байгуулж байсан бол энэ жил хүрээгээ тэлж, илүү олон оролцогчтой, баялаг хөтөлбөртэй болжээ. 

Уламжлал болсон “30 минутын лаб” сургалтууд, “PechaKucha” илтгэлүүд, “The Media Show” хэлэлцүүлгээс гадна шинэ туршлагаа бусдад хуваалцах “Урам зоригийн индэр” булан нэмэгдсэн гэнэ. 

Энэ жилийн илтгэлүүд юуг өгүүлэх вэ?

• Туурвин бичих арга зүй, 
• Хиймэл оюуны хэвлэл мэдээлэлд үзүүлж буй нөлөө, 
• Сэтгүүлчийн сэтгэл зүй, 
• Контент бүтээх тууштай замнал, 
• Олон улсад сэтгүүлчээр ажиллаж буй туршлага гэхчлэн маш олон талт сэдвүүдийг оролцогчдодоо хүргэх аж.

“The Media Show” хаанаас эхлэв? 

“The Media Show” арга хэмжээг санаачлагч Ж.Хулан: 

-Оюутан байхдаа BBC радиогоор “The Media Show” гэж нэвтрүүлгээр хэвлэл, мэдээллийн салбарын тухай, хөгжил дэвшил, шинэ трендүүдийн талаар сэтгүүлчид ярилцдаг нэвтрүүлгийг анх сонсож байлаа. Бас гаднын хэвлэлүүдэд Media гэдэг цэстэй, тэнд нь мөн л салбарын тухай бичиж, нийтэлдэг буюу Медиа гэдэг бол бусад категори, салбарын л адил өөрийн гэсэн тоглогчидтой, экосистемтэй, менежменттэй, хөгжлийн трендтэй, ярилцах зүйлстэй салбар юм гэдгийг ойлгож авч байлаа. Түүнээс хойш Монголдоо ийм яриа өрнүүлдэг болох сон гэж бодсоор 2020 онд подкастаа эхлүүлж, улмаар ньюслэттэрээ гаргаж байв. 

30 минутын лаб 

Салбарын шилдэг мэргэжилтнүүд сэтгүүл зүйн ур чадвар, шинэ чиг хандлага, сэтгүүлчдэд хэрэгцээтэй мэдээлэл, зөвлөмжийг хүргэх 30 минутын сургалтын цаг. 

1. University College London (UCL) их сургуулийн докторант, судлаач Г.Ганбат - “Хуурамч мэдээллийн эрин дэх медиа”
2. Ub.life сайт, “Гэрэг” сэтгүүлийн тоймч “Хөрөг” номын зохиогч Б.Энхцэцэг - “Хүний амьдралын түүхийг хэрхэн өгүүлэх вэ” 
3. Сэтгэл судлаач, Positive Dadal Гадаад харилцаа хариуцсан захирал Б.Алтанзул - “Сэтгүүлчид сэтгэл зүйн эрүүл мэндээ хамгаалах нь” 

PechaKucha 

Биднээс илүү туршлага хуримтлуулсан хүмүүс ямар зам туулж, юу алдаж, юуг оносноо нээлттэй хуваалцан үлгэр жишээ, сургамж, дэмжлэгээ түгээх болно. Бид энэ удаад олон улсад сэтгүүлчээр ажиллаж буй туршлага, контентоо тууштай бүтээх замнал, мэргэжилдээ үнэнч хэдэн арваныг зориулах сэтгэл зэрэг маш сонирхолтой түүхүүдийг өгүүлэх гэж байна. 

1. “Сэхээтэн” подкастын хамтран үүсгэн байгуулагч Б.Тайван - “Үнэн Бай” 
2. iToim.mn сайтыг хамтран үүсгэн байгуулагч, Ерөнхий редактор Э.Мөнхцэцэг - Хоргүй, хиргүй амжилт ба “iToim”-ын 9 жилийн түүх
3. BBC World Service - "The Climate Question" подкастын сэтгүүлч Ш.Цогзолмаа - “Английн медиа туршлагаас хуваалцах нь” 

Урам зоригийн индэр 

Шинийг бүтээнэ гэдэгт тийм ч амар байдаггүй. Он удаан жилийн бодол, олон удаа үзээд алдах зориг, бэрхшээл, саадыг давах тэвчээр гээд шинэ, жижиг алхам бүрийн цаана маш их хөдөлмөр байдаг билээ. Түүнийгээ бусдад хуваалцах, “Би чадлаа” гээд хашхирмаар үе ч бий. Ингэж гайхуулах хэсэг бол “Урам зоригийн индэр”. Харин зочид та бүхэн энэ хэсэгт л хамгийн чангаар алгаа ташиж урам хайрлаарай. 

1. Child.mn вэб сайтын үүсгэн байгуулагч, сэтгүүлч А.Уянга - Child.mn ээ үүсгэн байгууллаа! 
2. Unread Today сайтын Ерөнхий редактор М.Түшигт-Эрдэнэ - Unread newspaper хэвлэгдэж эхэллээ! 
3. Монголын баримт шалгах төвийн эрхлэгч Э.Батцэцэг - Сэтгүүл зүйн Итгэлцлийн стандарт (iso) гардлаа! 

The Media Show ярилцлага

Одоогоос яг дөрвөн жилийн өмнө 10 дугаар сард The Media Show подкаст ярилцлагаа хийж байжээ. Медиа бизнес, экосистемийн тухай хөөрөлддөг подкастынхаа шинэ дугаарын зочинтой арга хэмжээний индрээс ярилцах болно. 

1. NTV телевиз, “Медиа групп”-ийн Гүйцэтгэх захирал А.Баярбат нар оролцоно.