Соёл, спорт, аялал жуулчлал, залуучуудын сайд Ч.Номин NTV телевизийн "Лхагвын тойм" нэвтрүүлэгт орж, цаг үеийн асуудлаар ярилцсан. Түүний ярилцлагаас онцлох эшлэлүүдийг хүргэж байна. 

Нийтлэлийг зургаар үзэх бол энд дарна уу.

Соёл, спорт, аялал жуулчлал, залуучуудын сайд Ч.Номин:

1. Би сүүлийн 20 гаруй жил хувийн хэвшилд ажилсан хүний хувьд татвар төлөх, цалин тавих ямар хүндрэлтэй байдаг вэ гэдгийг мэднэ. Улсын төсөв бол татвар төлөгч иргэдээс бүрдсэн мөнгө. Тиймээс бид төсөвт маш хариуцлагатай хандаж, үрэлгэн төсвийг танах хэрэгтэй. Миний хувьд төсвийнхөө 1 төгрөг болгон дээр хариуцлагатай ханддаг.   
2. 18.3 тэрбум төгрөгийн асуудлыг санаатай санаандгүй байдлаар агуулгаас нь өөр зүг рүү чиглүүлж, хүмүүсийн хамгийн сайн мэддэг соёлын салбар руу иргэдийн анхаарлыг татан, бодлоготойгоор хийсэн улс төрийн акц гэж бодсон. Над дээр улс төр хийсэн гэж хэлнэ. Зохион байгуулалттайгаар, маш их санхүүжилт гаргаж хийсэн улс төрийн акц.
3. 18.3 тэрбум бол хүүхэд, залуучуудаа илүү өөртөө итгэлтэй, олон зүйлээс мэдлэг авсан, мэдээлэлтэй иргэн болгох хүний хөгжлийн бодлого юм. Бид нар хүүхдүүдээ дугуйлан секцэд хамруулах боломжтой хүмүүс. Гэтэл ийм боломжгүй маш олон хүүхдүүд байгаа. Тэгэхээр тэр нийгмийн болон соёлын зааг ялгааг арилгах хэрэгтэй. 
4. Би төсвийн тодотгол хийвэл 18.3 тэрбум төгрөгийн төсвийг хасуулахгүй, хамгаална. Хасах ёсгүй гэж бодож байна. Энэ чинь хуультай. 18.3 тэрбумын хэрэгжилт унавал би улс төрийн хариуцлага хүлээнэ.
5. Би бол Тэрэлжид буюу миний хамаарал бүхий газар очиж төсөв хэлэлцэхэд маш дургүй байдаг. Би үүнийг зохион байгуулдаггүй. Гэтэл надаас болоод тэр газар эрсдэл үүсэж байна. Надад бол үнэхээр төвөгтэй байдаг. Надад давуу тал үүсгэх биш сул тал үүсгэж байна. Ер нь миний хамаарал бүхий газар очиж иймэрхүү уулзалт, хурал битгий хийгээсэй гэж боддог. 
6. Би өнгөрсөн жил 6-7 томилолтод 20 гаруй хоногоор явсан. Би чинь ээж хүн байхгүй юу. Надад бол нэг илүү хоногийг ч хүүхдүүдтэйгээ зарцуулах нь чухал. Би сайн гэр бүлд төрж өссөний буянд явах газраараа хангалттай явчихсан. Тэр газруудаар ямар явж үзээгүй байгаа биш дээ. Тиймээс богино хугацаанд ажлаа амжуулаад ирдэг.      
7. Би тариаланч гэр бүлд төрж өссөн. Ургацын дээжээ хамт олон, хамтрагч байгууллагууддаа өгдөг. Түүнээс биш төмсөөр цалин хөлсийг нь олгодог юм байхгүй. Шал худлаа гүтгэлэг хийх хэрэггүй. 
8. Би сэтгүүлч нарыг нээлттэйгээр хардаж сэрдээд, хяналт тавьж ажиллаасай гэж боддог. Гэхдээ бас хэрээс хэтэрч, гүтгэлэг хийж болохгүй. Та нар бас уншвал аягүй гомдмоор гомдмоор сэтгэгдлүүд бичигддэг. Эмэгтэй хүнд хэлж боломгүй боломгүй юмыг хэлнэ.