Авто машины дугаар олгохыг хязгаарласан шийдвэрийг шүүхээр хэлэлцэнэ.

Учир нь НИТХ-ын 2024 оны хоёрдугаар сарын 8-ны "Нийслэл хотод олгох тээврийн хэрэгслийн улсын бүртгэлийн дээд хязгаарыг тогтоох тухай" 18 тоот тогтоолыг хүчингүй болгуулах нэхэмжлэлд Нийслэл дэх Захиргааны хэргийн анхан шатны шүүх хүлээн авч, өнгөрөгч сарын 25-нд хэрэг үүсгэсэн байна.

Нэхэмжлэлийг шинээр авто машин худалдан авсан иргэн гаргажээ.

Тэр нэхэмжлэлдээ НИТХ-ын шийдвэр нь Монгол Улсын Үндсэн хуулийн 16-р зүйлийн 3 дахь хэсэгт “хөдлөх, үл хөдлөх хөрөнгө шударгаар олж авах, эзэмших, өмчлөх, өв залгамжлуулах эрхтэй. Хувийн өмчийг хууль бусаар хураах, дайчлан авахыг хориглоно” гэж заасныг зөрчсөн хэмээн үзсэнээ тайлбарласан байна.