Гадаадын хөрөнгө оруулалтаар амжилттай хэрэгжиж буй 5 төслийг онцолж байна.

1. АШУҮИС-ийн Монгол-Японы эмнэлэг

Хөрөнгө оруулалт: Япон

Хөрөнгө оруулалтын дүн: 9 тэрбум 378 сая иен

• Эмнэлгийн барилгад 7 тэрбум 985 сая иен, 
• Аппарат тоног төхөөрөмж, багаж хэрэгсэлд 1 тэрбум 393 сая иен

2012 оноос яригдаж эхэлсэн Монгол-Японы эмнэлгийг 2019 оны дөрөвдүгээр сард ашиглалтад оруулсан.

Эмнэлэг ашиглалтад орсноор Монголд эмчлэх боломжгүйд тооцогддог зүрх, судасны, тархины, хавдрын зэрэг 26 өвчнийг эмчлэх боломжтой болсон юм. 

Сүүлийн 5 жилийн хугацаанд тус эмнэлэг нь ачааллаа дийлэхгүй байгаа эрүүл мэндийн салбарын ачааллаас хуваалцсаар байна. 

Ямар үр дүн гарав?

• Монгол-Японы эмнэлэг нь сургалтын эмнэлэг гэдгээрээ онцлог юм. АШУҮИС-ыг төгсөн гарч буй эмнэлгийн мэргэжилтний мэргэжлийн мэдлэг, ур чадварыг дээшлүүлэх эрүүл мэндийн салбарын бодлого, эрэлт хэрэгцээнд нийцсэн хүний нөөцийг бэлтгэхэд чухал үүрэгтэй.
• Тэр ч утгаараа жилд 7000 гаруй оюутан, 1000 орчим эмч, эмнэлгийн мэргэжилтэнд дэлхийн жишигт нийцсэн бодит эмнэл зүйн сургалтыг үзүүлдэг байна. 
• Эмнэлгийн амбулатори нь нэг өдөрт л гэхэд 400 гаруй хүнд үйлчилдэг аж. 

2. Монцемент билдинг материалс ХХК

Хөрөнгө оруулалт: Хятад, Украин, Монгол, Их Британи, Энэтхэг, Сингапур, Англи, Швейцарь, Франц, Дани

Хөрөнгө оруулалтын дүн: 300 сая орчим ам.доллар

Монцемент үйлдвэрийг Хөгжлийн банкнаас зээл авсан гэдгээр нь олон нийт сайн мэднэ. 

Гэхдээ Монцемент үйлдвэрийг байгуулсан нийт хөрөнгө оруулалт нь 300 сая орчим ам.доллар. Үүний 20 хувь болох 65 сая ам.доллар буюу 126.6 тэрбум төгрөгийг Хөгжлийн банкнаас зээлсэн. 

Үүнийг буцаагаад 260.2 тэрбум болгон төлж, 2023 онд зээлээ бүрэн хаасан юм. Үлдсэнийг хөрөнгийг дээр улсуудаас татжээ. 

Ямар үр дүн гарав?

• 1 сая тонн цемент үйлдвэрлэх хүчин чадал бүхий үйлдвэр байгуулагдсанаар дотоодын цементийн хэрэгцээг хангахад чухал нөлөө үзүүлэв. 
• 1000 гаруй мэргэжлийн ажиллах боловсон хүчнийг бэлтгэж, ажлын байраар хангаж байна. 
• Олон улсын болон Монгол Улсын стандартын шаардлагад бүрэн нийцсэн бүтээгдэхүүн үйлдвэрлэж байна. 

3. Монгол хаан жүжиг

Хөрөнгө оруулалт: Сингапур

Хөрөнгө оруулалтын дүн: 1.1 сая ам.доллар 

Сингапур улсын Марина Бэй Сэндс цогцолборт  “Монгол хаан” жүжиг гурван долоон хоног тоглосон билээ. 

Тус жүжигт Сингапур улсын Base Entertainment Asia хөрөнгө оруулалт хийж, хамтран продюсинг хийсэн. 

"Монгол хаан" жүжгийн Сингапур дахь тоглолт нь Монголын урлагийн зах зээлд олон улсаас хөрөнгө оруулалт татаж, олон улсад тоглолт хийсэн анхны тохиолдол болсон юм. 

Ямар үр дүн гарав?

• “Монгол хаан” жүжиг дэлхийд Монгол Улсын соёлын томоохон сурталчилгаа болсон. 
• “Монгол хаан” жүжгийн Сингапур дахь тоглолтыг АНУ, БНХАУ, Япон, Өмнөд Солонгос, Турк, Арабын булангийн орнууд, Их Британи, Австрали зэрэг улсын продюсинг 10 орчим компани ирж үзэж, 2025-2026 оны аялан тоглолтуудын Санамж бичгүүдийг үзэглэжээ.

4. Тайширын усан цахилгаан станц

Хөрөнгө оруулалт: Австри

Хөрөнгө оруулалтын дүн: 14 сая евро

Тус усан цахилгаан станц нь 2001 оны нэгдүгээр сарын 22-ны өдөр анх Говь-Алтай аймгийн Тайшир сумын нутагт  “Улаан боомын” УЦС гэж Уулын орой дээр шав тавьжээ.

Ийнхүү 2004 оны аравдугаар сарын 05-нд УЦС-ын бүтээн байгуулалтын үйл ажиллагаагаа эхэлж, 2008 онд ашиглалтад орсон байна. 

Ямар үр дүн гарав?

• Говь-Алтай аймгийн 19 мянга гаруй хэрэглэгчид стандартын шаардлага хангасан ундны усаар хангадаг. 
• Тайширын УЦС ашиглалтад орсноор 2008-2020 онд 250 сая кВт цаг цахилгаан эрчим хүч үйлдвэрлэж, 43 сум суурин, 1000 орчим аж ахуйн нэгж, байгууллагыг цахилгаанаар хангаж байна. 
• Мөн уламжлалт буюу дизель станцтай харьцуулахад нэг кВт цаг тутамд 700-750 төгрөг хэмнэж, улсын төсөвт 175-200 тэрбум төгрөгийн боломж бий болгон эдийн засгийн хувьд анх байгуулсан өртгөө бүрэн нөхөж, дахин хоёр УЦС барих хэмжээгээр хэмнэжээ. 

5. Оюу толгой

Хөрөнгө оруулалт: Рио тинто, Англи-Австралийн үндэстэн дамнасан корпорац

Нийт хөрөнгө оруулалт: 19 тэрбум ам.доллар

Монгол Улсын  Засгийн газар “Рио Тинто интернэшнл холдингс лимитед” компанийн хооронд Оюу Толгойн зэс, алтны ордыг ашиглах “Хөрөнгө оруулалтын гэрээ”-г 2009 онд байгуулжээ. 

Ямар үр дүн гарав?

• 2024 оны байдлаар нийт 20 мянга гаруй хүнийг ажлын байраар хангаж байна. 
• 2023 оны байдлаар 900 орчим ханган нийлүүлэгчтэй хамтран ажиллаж байгаагаас 704 нь дотоодын компаниуд байгаа юм. 
• Монголын эдийн засгийн өсөлт буюу ДНБ-ий 12 хувь, нийт гадаадын шууд хөрөнгө оруулалтын 90 хувийг Оюу толгой төслөөс бүрдүүлж байна.