Монгол Улсын Ерөнхийлөгч У.Хүрэлсүх 2024 оны 11 сарын 20-нд УИХ-ын баталсан Монгол Улсын 2025 оны төсөвт хориг тавьсан. Иймд Засгийн газраас төсвийг дахин боловсруулж, 2.1 их наядаар бууруулан УИХ-д өргөн барьсан. Ийнхүү УИХ өчигдөр буюу 12 сарын 12-нд шинээр өргөн барьсан төсвийн төслийг эцэслэн баталсан. 

Харин өнөөдөр буюу 12 сарын 13-нд Монгол Улсын Ерөнхийлөгч У.Хүрэлсүх 2025 оны Улсын төсөвт дахин хориг тавихгүй гэдгээ мэдэгдлээ. 

Мэдэгдлийг Монгол Улсын Ерөнхийлөгчийн Тамгын газрын дарга Г.Занданшатараас УИХ-ын ЕНБД Б.Баасандоржид албан бичгээр хүргүүлжээ. 

Албан бичигт “УИХ-ын 2024 оны 12 сарын 12-ны өдөр ёсчлон ирүүлсэн Монгол Улсын 2025 оны төсвийн тухай хууль болон дагалдан батлагдсан хууль тогтоомжтой Монгол Улсын Ерөнхийлөгч танилцаад, хориг тавихгүй гэж шийдвэрлэснийг үүгээр уламжилж байна”  гэжээ.