Англи хэлэнд “boycott” гэж үг бий. “Хориглох, эсэргүүцэх, үл ойшоох” гэх утгатай тус үгийг дэлхийн бусад улс оронд аливаа асуудалд холбогдсон алдартан, бизнесменүүд, байгууллагын эсрэг бодитоор ашиглаж чаддаг. Түүнчлэн “cancel culture” буюу ёс бус үг, үйлдэл гаргасан урлаг соёлын алдартнуудыг татан буулгах буюу сошиал платформуудаас “арчин хаядаг” тогтолцоо бий. Өөрөөр хэлбэл, ёс бус үг, үйлдэл гаргасан алдартныг сошиал платформоор дагахгүй, блок хийх, олон нийтийн телевизийн нэвтрүүлгээр гаргахгүй, томоохон арга хэмжээнүүдэд оролцуулахгүй, сурталчилж буй бараа бүтээгдэхүүнийг нь худалдан авахгүй байхыг хэлдэг. БНСУ-д хүртэл дээрэлхэл, гадуурхалт болон гэмт хэрэг үйлдсэн зарим алдартнуудаа телевизээр гарахыг хориглож, “хар жагсаалт”-д оруулсан тохиолдол цөөнгүй. Монголд харин эсрэгээрээ. Гэмт хэрэгт холбогдсон, ёс бус үг, үйлдэл гаргасан алдартнууд улам алдартай болж, сошиал хуудасных нь дагагч ч огцом өсдөг жишигтэй. Мэдээж тухайн алдартныг boycott эсвэл cancel culture хийх нь тухайн хүний эрх ч тэдний хийсэн буруутай үйлдлийг өөгшүүлэхгүй байх нь ирээдүйн нийгэмд тустай. Учир нь “алдартан”-уудыг харж, даган дуурайдаг хойч үе бий. Энэ онд олон нийтийн цахим сүлжээнд шуугиан тарьж, гэмт хэргийн шинжтэй үйлдэлд холбогдсон зарим олны танил эрхмүүдийг онцолж байна.   

2024 оны 4 сар 

"Эмоци" продакшны жүжигчин Б.Номин "Baji&Ylalt" влогийн 201 дэх зочноор оролцож, ярилцлагынхаа үеэр "Оюутан байхдаа доод үеийнхнийгээ дээрэлхэж байгаагүй" хэмээн ярьсан байдаг. Гэвч нэвтрүүлгийн дараа жүжигчин Т.Бадамжав, Б.Мишээл, Б.Номин нарын доод курст сурч байсан гэх охин тэднийг оюутан байхдаа бусдыг дээрэлхдэг байсан тухай шүгэл үлээснээр "СУИС-ийн курсийн ялгаа, дээрэлхэл" олны анхаарлыг татсан юм. Уг асуудлаар  төгсөгчдөөс цагдаагийн байгууллага мэдүүлэг авч, СУИС дээр ХЭҮК ажиллаж байв. 

2024 оны 9 сар 

Ерөнxий сайд Л.Оюун-Эрдэнийн "Залуучуудын асуудал xариуцсан" зөвлөx  асан Сексцагаанбогд буюу реппер Б.Гантулгын найз охиноо зодож буй бичлэг цахим орчинд цацагдсан. Бичлэгийн дагуу тус хэргийг цагдаагийн байгууллагаас шалгаж, Зөрчлийн хуулийн дагуу 100 мянган төгрөгөөр торгуулсан юм. 

2024 оны 10 сар 

Жүжигчин Б.Амарсайхан Halloween-ы баяраар “Хаалга нүдлээ” гэж уурлан гарч ирээд 13-15 насны 3 хүүхдийг лифтэнд зодсон. Тодруулбал нэг хүүхдийг хэвлий рүү нь өшиглөж, бусад гурван хүүхдийн толгой руу нь цохиж байгаа нь бичигдсэн байдаг. Уг хэрэг 2024 оны 10 сарын 30-нд болсон бөгөөд 11 сарын 1-ний өдөр Цагдаагийн байгууллагад мэдэгдсэн. Хэргийг цагдаагийн байгууллагаас шалгаж байгаа гэхээс өөр мэдээлэл байхгүй байна. 

2024 оны 11 сар

Хип хоп дуучин Roockie буюу У.Мөнхбагана “CU”-ийн ажилтанд гар хүрч буй бичлэг олон нийтийг хэсэгтээ л шуугиулсан бөгөөд 100 мянган төгрөгөөр торгуулаад өнгөрсөн. Ташрамд, тэрбээр 2020 онд хар тамхины хэргээр 10 сар хоригдож, 2023 онд гэр бүлийн хүчирхийлэл үйлдсэн, бусдын биед хүнд гэмтэл учруулсан гэх Эрүүгийн хэргээр Хан-Уул дүүргийн цагдаагийн нэгдүгээр хэлтэст шалгагдаж байсан билээ. 

2024 оны 12 сар 

“Этик” продакшны жүжигчин С.Одбаяр сарын өмнө бусдыг зодож, танхайрсан бичлэг нь өнгөрсөн шөнө цацагдсан бөгөөд хэргийг цагдаагийн байгууллагаас шалгаж байгаа. Уг асуудлаар хэрэгт холбогдсон жүжигчин С.Одбаяр өөрөө “Согтуудаа ямар муухай харагддагаа мэдэж авлаа. Өөрийгөө өмөөрч юу ч яримааргүй байна” хэмээн мэдэгдэл хийж, прокшны хамт олон, найд нөхөд, гэр бүлээсээ уучлал гуйсан юм. Гэвч бичлэгт зодуулж буй буюу өөрийнхөө зодсон хүнээс уучлал гуйгаагүй.