Засгийн газрын үйл ажиллагааны хөтөлбөр батлагдсанаас хойш 100 хоног болсныг тохиолдуулан Ерөнхий сайд Л.Оюун-Эрдэнэ мэдээлэл өглөө. Энэ үеэр тэрээр утаа гамшиг болсон. Тиймээс Засгийн газраас өндөржүүлсэн бэлэн байдлын зэрэгт шилжүүлснийг зарлалаа. 

Энэ талаар Ерөнхий сайд Л.Оюун-Эрдэнэ "Нийслэлийн түгжрэл, агаарын бохирдол, эрчим хүчний дутагдал гамшгийн хэмжээнд хүрлээ. Тиймээс өндөржүүлсэн бэлэн байдлын зэрэгт шилжүүлж байна. Нийслэлийн тулгамдсан асуудлыг яаралтай шийдвэрлэх хүрээнд УИХ-тай хамтарч ажиллахын тулд эрх зүйн тусгай орчин шаардлагатай гэж үзсэн. Тиймээс үүнийг УИХ-д танилцуулж, дэмжлэг явъя гэж Засгийн газрын хуралдаанаар ярилцлаа. Одоогийн байдлаар нийслэлийн утаа, түгжрэл гэх асуудал 50 гаруй хуулиар зохицуулагддаг. Агаарын бохирдол, түгжрэл бол гамшиг учраас эрх зүйн байдлыг сайжруулна" гэлээ. 

Өндөржүүлсэн бэлэн байдал нь 12-р сарын 20-оос 2025 оны гуравдугаар сарын 1-н хүртэл үргэлжлэх юм байна. 

Гамшгаас хамгаалах өндөржүүлсэн бэлэн байдлын үед яг яадаг вэ? 

Гамшгийн зарлан мэдээлэх дохиог иргэдэд хүргэх, хэвлэл мэдээллийн байгууллагууд гамшигтай холбоотой мэдээ, мэдээллийг нэн даруй дамжуулах, хүн хүч, техник, материал хэрэгслийг дайчлах, хорио цээрийн дэглэм тогтоох, гамшгийн нөөцийг нэмэх зэрэг арга хэмжээг авдаг.

Монгол Улсын Гамшгаас хамгаалах тухай хуульд зааснаар өндөржүүлсэн бэлэн байдлын зэргийг дараах байдлаар тусгажээ.

10.4.Тодорхой нутаг дэвсгэр, объектод гамшгаас урьдчилан сэргийлэх, эрэн хайх, аврах, хор уршгийг арилгах, хойшлуулшгүй сэргээн босгох ажиллагааг хэрэгжүүлэх зорилгоор өндөржүүлсэн бэлэн байдлын зэрэгт шилжүүлж дараах арга хэмжээг авна:

10.4.1.гамшгийн зарлан мэдээллийн дохиог хүн амд хүргэх, гамшгаас хамгаалах төлөвлөгөөнд тодотгол хийх, хэрэгжүүлэх;

10.4.2.засаг захиргаа, нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг ажлын тусгай горимд шилжүүлэх;

10.4.3.гамшгийн зарлан мэдээллийг хүн амд шуурхай, хүртээмжтэй хүргэх;

10.4.4.хорио цээрийн дэглэм тогтоох, хүч хэрэгсэл, гамшгийн болон орон нутгийн нөөцийг дайчлах;

10.4.5.гамшгийн нөөцийг улсын хэмжээнд Засгийн газрын шийдвэрээр, орон нутагт тухайн шатны Засаг даргын шийдвэрээр нэмэгдүүлэх.

10.5.Харилцаа холбоо, хэвлэл мэдээллийн байгууллага нь өндөржүүлсэн болон бүх нийтийн бэлэн байдлын үед гамшигтай холбоотой мэдээ, мэдээллийг дараалал харгалзахгүй хүлээн авч дамжуулна.

10.6.Засаг захиргаа, нутаг дэвсгэрийн хэд хэдэн нэгжид үүссэн голомтын бүсэд эрэн хайх, аврах, хор уршгийг арилгах, хойшлуулшгүй сэргээн босгох ажиллагааг хэрэгжүүлэх зорилгоор бүх нийтийн бэлэн байдлын зэрэгт шилжүүлж дараах арга хэмжээг авна:

10.6.1.харилцаа холбоо, эрчим хүч, шатахуун түгээх газар болон стратегийн зориулалттайгаас бусад үйлдвэр, үйлчилгээний байгууллагын үйл ажиллагааг тодорхой хугацаагаар хязгаарлах;

10.6.2.гамшгаас хамгаалах төлөвлөгөөнд заасан арга хэмжээг авч хэрэгжүүлэх.

10.7.Бүх нийтийн бэлэн байдлын зэрэгт шилжүүлсэн үед энэ хуулийн 10.4.1-10.4.5-д заасан арга хэмжээг нэгэн адил хэрэгжүүлнэ.

10.8.Энэ хуулийн 10.4.2-т заасан ажлын тусгай горимоор ажиллах журмыг онцгой байдлын асуудал эрхэлсэн төрийн захиргааны байгууллагын дарга батална.