Засгийн газрын үйл ажиллагааны хөтөлбөр батлагдсанаас хойш 100 хоног өнгөрч, энэ хугацаанд ямархуу ажилласан талаараа Ерөнхий сайд Л.Оюун-Эрдэнэ мэдээлэл хүргэлээ. Энэ үеэр тэрээр олон жил гацсан Эрдэнэбүрэнгийн усан цахилгаан станцын бүтээн байгуулалтыг ирэх онд эхэлнэ хэмээх мэдээллийг өгөв. 

Энэ талаар Ерөнхий сайд Л.Оюун-Эрдэнэ "Эрдэнэбүрэнгийн усан цахилгаан станцыг байгуулах зээлийн хэлэлцээрт гарын үсэг зурсан, ажил нь ирэх хавар эхэлнэ. Энэ бол олон улсад болон эрчим хүчний салбарт сайн дохио өгч байна. Бусад улсуудын Үндэсний баялгийн сангуудын төлөөлөлтэй ярьж байхад Монгол Улсын эрчим хүч экспортлох бүс нь говийн бүс байх боломжтой гэж үзэж байна. Ялангуяа, 2030 оноос БНХАУ-д эрчим хүчний хэрэглээ нэмэгдэх төлөвтэй байгаа тул Монгол Улс эрчим хүчний мега төслийг говийн бүсэд эхлүүлнэ" гэв. 

Эрдэнэбүрэнгийн УЦС-ын түүх

• Эрдэнэбүрэнгийн усан цахилгаан станцын бүтээн байгуулалт 2018 оноос яригдаж эхэлсэн.
• Ховд аймгийн Эрдэнэбүрэн, Увс аймгийн Өмнөговь, Баян-Өлгий аймгийн Баяннуур хэмээх гурван сумыг дамнана. Энэ нь иргэдийн эсэргүүцэлтэй тулгараад байгаа.
• 2021 оны есдүгээр сард гүйцэтгэгч компанитай гэрээ байгуулсан. 
• Төслийн нийт хөрөнгө оруулалт нь 818.0 тэрбум төгрөг бөгөөд БНХАУ-ын хөнгөлөлттэй зээлийн хөрөнгөөр 95 хувийг, улсын төсвөөс 5 хувийг санхүүжүүлж, 2021-2025 онд хэрэгжүүлэхээр төлөвлөсөн.