Засгийн газрын үйл ажиллагааны хөтөлбөр батлагдсанаас хойш 100 хоног өнгөрч, төсөв батлахад ч харагдахгүй байсан Ерөнхий сайд олны өмнө гарч мэдээлэл хийлээ.Энэ үеэр Эрдэнэс Тавантолгой ХК ашигтай ажилласныг дурдаад, иргэдэд ногдол ашиг гэж 337.7 мянган төгрөг олгоно. Нэг дор энэ мөнгийг тараах нь инфляцыг өдөөх тул гурав хувааж олгоно гэсэн юм.Энэхүү гурав хувааж буйн эхний мөнгө болох 135 мянган төгрөгийн ногдол ашгийг өнөөдрөөс эхлэн и-баримтад бүртгэлтэй данс руу шилжүүлж байна. 

Нийтлэлийг зургаар үзээрэй. 

Хуулийн зөрчил 

• Компанийн тухай хуулиар ТУЗ нь санхүүгийн жил дууссанаас хойш 50 хоногийн дотор ногдол ашиг хуваарилах талаар хэлэлцэн шийдвэрлэнэ гэж заасан.

Гэтэл санхүүгийн жил дуусаа ч үгүй байхад Ерөнхий сайд ийн мэдэгдэл нь хийсэн нь Эрдэнэс Тавантолгой ХК-ийг хууль зөрчихөд хүргэж байна. 

• Эрдэнэс Тавантолгой ХК-ийн ТУЗ нь У.Бямбасүрэнгээр удирдуулсан 8 хүн байдаг бөгөөд тэд ойрын хугацаанд хуралдаагүй байна. 

Засгийн газар Үндсэн хуулийн үүргээ биелүүлж чадсангүй

• Сүүлийн үед агаарын бохирдол их байгаа учир ард иргэд бухимдаж, түүнийг дагаад ч дээд албан тушаалтнууд сандарч байна.
• Энэхүү үйл явдал дундуур Ерөнхийлөгч У.Хүрэлсүх томоохон албан тушаалтнуудыг дуудаж уулзсан нь олон нийтийн анхаарлыг татсан. 
• Энэхүү уулзалт нь Засгийн газар Үндсэн хуулиар хүлээсэн үүрэг болох иргэдээ эрүүл орчинд амьдруулах үүргийг биелүүлж чадахгүй байгаагийн илрэл болсон юм. 

Засгийн газар ганхаж эхлэв

• Утааг дагаад ч Хамтарсан Засгийн газрыг унагаая гэх санал энд тэндээс гарч байна. 
• Ерөнхий сайд Л.Оюун-Эрдэнийн Үндсэн хуулийг өөрчлөн байж байгуулсан Хамтарсан Засгийн газар ийнхүү ганхсан тул иргэдийг тайвшруулах нэг зүйл хийх шаардлагатай болсон. 
• Харин Л.Оюун-Эрдэнийн тэрхүү нүүдэл нь Эрдэнэс Тавантолгой ХК-ийн ногдол ашиг байлаа. 

Ногдол ашгийг 3 хувааж олгох тактик

• Эрдэнэс Тавантолгой ХК-ийн ногдол ашгийг 3 хувааж олгоно гэдэг нь Ерөнхий сайд Л.Оюун-Эрдэнийн суудлаа алдахгүй гэсэн төлөвлөгөө байж болох юм. 
• Эхлээд 135 мянга өгөхөд ард түмэн тайвширна, дахиад уурлахаар нь дахиад үлдэгдлээс нь өгнө, дахиад бүр их уурлахаар үлдэгдлийг өгнө. 
• Ингээд иргэдийн уур бухимдлыг хэдхэн талхны мөнгөөр ийнхүү намжаах зуур зун болчихно гэж найдсан байж болох юм.

Энэ бүхэн юу болж дуусах вэ?

• Эрдэнэс Тавантолгой ХК-ийн ногдол ашиг урьдчилсан байдлаар 4.3 их наяд төгрөг хуваарилахаар байна. Үүнийг гурван хувааж өгнө гэхээр нэг удаадаа зах зээл рүү дор хаяж, 1.4 их наяд төгрөг урсаж орно гэсэн үг. 
• Тэгэхээр Эрдэнэс Тавантолгой ХК-ийн ногдол ашгийг гурав хувааж олгосон, олгоогүй инфляцад нөлөөлнө. 
• Зарим иргэний амьдралд 135 мянган төгрөг зайлшгүй хэрэгтэй юу гэвэл хэрэгтэй. Гэхдээ нийт нийгэмдээ энэ мөнгийг зарцуулж, ядаж л тасраад байгаа эрчим хүчээ шийдэхэд зарцуулах хэрэгтэй байна.