2025 оны нэгдүгээр сарын 1-ээс хэрэгжиж эхэлж буй хуулиудыг танилцуулж байна. 

Алдарт эхийн одонгийн мөнгө нэмэгдэнэ

• Дөрвөөс дээш хүүхэд төрүүлж, өсгөсөн ээжүүдэд хуулийн дагуу “Эхийн алдар I, II” одонг гардуулдаг билээ.
• Одонтой ээжүүдэд урамшуулал гэж жилд нэг удаа 100 мянга (Эхийн алдар II), 200 мянган (Эхийн алдар I) төгрөг олгодог. 
• Тэгвэл энэхүү урамшуулал 2025 онд хоёр дахин нэмэгдэж, 200 мянга болон 400 мянган төгрөг болж байна. 

Ахмад настны тэтгэврийг өөрийнх зөвшөөрөлгүй зарцуулбал хорих хүртэл ялтай

• Ахмад настнуудад ирж буй хүчирхийллийн 36 хувийг эдийн засгийн хүчирхийлэл эзэлдэг аж. 
• Энэ нь ахмад настны тэтгэвэр, тэтгэмжийг нь зөвшөөрөлгүй зарцуулах, барьцаалж зээл авах, өмч хөрөнгийг нь дур мэдэн зарцуулах зэрэг үйлдэл юм. 
• Тэгвэл энэхүү үйлдэлд Эрүүгийн болон Зөрчлийн тухай хуулиар нэг жил хорих хүртэл ял оноох заалт шинэ оноос хэрэгжиж эхэлнэ. 

Эрүүгийн тухай хуульд, 

1.3 Тэтгэвэр, тэтгэмж, хуваарьт болон дундын эд хөрөнгөө эзэмших, ашиглах, захиран зарцуулах эрхэд халдсан бол зургаан сараас нэг жил хүртэл хугацаагаар зорчих эрхийг хязгаарлах, эсхүл зургаан сараас нэг жил хүртэл хугацаагаар хорих ял шийтгэнэ.

Зөрчлийн тухай хуульд, 

4.5 Ахмад настны тэтгэвэр, тэтгэмжээ ашиглах, захиран зарцуулах эрхэд халдсан нь эрүүгийн хариуцлага хүлээлгэхээргүй бол албадан сургалтад хамруулж долоогоос 30 хоногийн хугацаагаар баривчлах шийтгэл оногдуулна. 

10 жилийн дараа автобусны үнэ нэмэгдлээ

• Автобусны үнийг 2014 онд 500 төгрөг байхаар тогтоож байжээ. Тэгвэл 2025 оноос автобусны төлбөр 1000 төгрөг болж байна. 
• Ийнхүү 1000 төгрөг төлснөөр өдөрт хугацаа хамаарахгүй дөрвөн удаа зорчино. Хэрэв дөрвөөс дээш удаа зорчихоор бол дахин 1000 төгрөг төлөх аж. 
• Түүнчлэн оюутнуудад өгдөг автобусны хөнгөлөлт хүчингүй болсон тул 1000 төгрөгөө төлж зорчих юм байна шүү.  

Цэргүүдийн онцгой нөхцөлийн нэмэгдлийг 10-25 хувь болно

• Зэвсэгт хүчин, хилийн цэргийн офицер, ахлагч 10 хувь, 
• Дотоодын цэргийн офицер, ахлагч 15-25 хувь, 
• Шүүхийн шийдвэр гүйцэтгэх байгууллага, хорих байгууллагын албан хаагчид 10-25 хувиар албан ажлын онцгой нөхцөлийн нэмэгдлийг авна. 
• Тухайн алба хаагчийн албан тушаалын үндсэн цалингийн хувиар тооцож, сар бүр олгох тогтоол 2025 оны нэгдүгээр сарын 1-нээс мөрдөгдөж эхэлнэ.

Автомашинд хотын дугаар олгох хүсэлтийг цахимаар авч эхэллээ

• Тээврийн хэрэгсэлд Улаанбаатар хотын дугаар олгох цахим нээлттэй систем бэлэн болжээ.
• Энэхүү систем нь найман шалгуур үзүүлэлтээр тухайн машины үзүүлэлт болон машин эзэмшигчийг үнэлж оноо өгөх аж. 
• Өгөгдсөн онооны дагуу нэг сарын хугацаанд эрэмбэлэгдсэнээр Улаанбаатарын дугаар олгоно. Өөрөөр хэлбэл, 8 шалгуураа хангаж, өндөр оноо авбал бусдаас түрүүлж улсын дугаараа авна гэсэн үг. 

Торгуулиа төлөхгүй бол нийтэд тустай ажил хийнэ

• Тээврийн хэрэгслийн жолооч нь 450 мянган төгрөгөөс дээш торгуультай байх юм бол нийтэд тустай ажил албадан хийх журам нэгдүгээр сарын 1-ээс хэрэгжиж эхэлнэ.
• Ингэхдээ нэг өдрийн найман цагаар буюу 15 мянган төгрөгөөр тооцон төлбөрийг авна. 
• Жишээлбэл, 450 мянган төгрөгийн торгуультай жолооч 30 хоног нийтэд тустай ажил хийнэ гэсэн үг. 

Автомашины албан татвар нэмэгдэнэ

• НИТХ-ын хуралдаанаар баталсан автомашин болон өөрөө явагч хэрэгслийн албан татварын шинэчлэл шинэ оноос хэрэгжиж эхэлнэ.
• Энэ хүрээнд жолооч нар авто машины моторын багтаамжаас хамаарч дараах дүнтэй татвар төлөх юм. 

Татвар нь моторын багтаамжаас хамаарч өөр өөр байна. 

4000-аас дээш бол өдөрт 694, жилд 250 мянган төгрөг 

2001-3000 бол өдөрт 416, жилд 150 мянган төгрөг 

2000 хүртэлх бол өдөрт 275, жилд 100 мянган төгрөг 

Төрийн албан хэргийг хос бичгээр хөтөлнө

• 2025 оны нэгдүгээр сарын 01-нээс эхлэн төрийн болон орон нутгийн байгууллагууд албан хэргээ хос бичгээр хөтлөх хууль хэрэгжинэ.
• Хууль хэрэгжихээс өмнө төрийн захиргааны бүх шатны байгууллагын төрийн албан хэрэгт кирил болон үндэсний бичгийн хэлний хэм хэмжээг мөрдүүлж хэвшүүлэх ажлыг зохион байгуулсан.
• Энэ хүрээнд зарим төрийн байгууллага албан сайтаа монгол бичгээр хөтөлж байна. 

Тэтгэврийг 6 хувиар нэмнэ

• Тэтгэврийн хэмжээг өмнөх оны инфляцын жилийн дундаж түвшинтэй уялдуулж жил бүрийн нэгдүгээр сарын 01-ний өдрөөс эхлэн нэмэгдүүлэх хуультай. 
• Тэтгэврийн хэмжээг 6 хувиар нэмэгдүүлэхэд 297.4 тэрбум төгрөг зарцуулна. Энэ хүрээнд 

Нийгмийн даатгалын сангаас олгох бүрэн тэтгэврийн болон цэргийн тэтгэврийн доод хэмжээг 689 мянган  төгрөгөөр, 

Нийгмийн даатгалын сангаас олгох хувь тэнцүүлэн тогтоосон тэтгэврийн доод хэмжээг 572,400 төгрөгөөр тус тус шинэчлэн тогтоов.

Зам ашигласны төлбөр нэмэгдэнэ

• Зам ашигласны төлбөр дараах байдлаар нэмэгдэнэ. Энэхүү төлбөрийг жилд нэг удаа төлдөг.

2000 хүртэлх моторын багтаамжтай машин 20 мянган төгрөгөөс 100 мянга

2001-3000 хүртэлх моторын багтаамжтай машин 30 мянган төгрөгөөс 150 мянга 

4001 дээш моторын багтаамжтай машин 50 мянган төгрөгөөс 250 мянга

ААН-ийн орлогын албан татварын тухай хууль өөрчлөгдөв

• ААН нь орлого олох үйл ажиллагаатай хамааралгүй, нийгмийн хариуцлагын хүрээнд дэмжих зорилгоор элэгдэл тооцох үндсэн хөрөнгөд оруулсан хөрөнгө оруулалт, харилцан хамааралгүй бусад этгээдэд олгосон санхүүгийн дэмжлэг, хандивын зардлыг албан татвараас хөнгөлнө. 
• Хөнгөлөх дүн нь тухайн татварын жилийн татвар ногдох орлогын 1 хувь хүртэл хэмжээнээс хэтрэхгүй байна.