Испанийн Супер цомын финалын тоглолт урьд шөнө Арабын хойгт тэр дундаа Саудын Арабын Жидда хотын 62 мянган хүний суудалтай “King Abdullah Sports City” цэнгэлдэхэд боллоо.

Уг тоглолтод “Барселона” клуб “Реал Мадрид”-ыг 5:2 харьцаатай хожсоноор ээлжит цомын эзнээр шалгарлаа. Тоглолтод Барсагаас Рафинья /39 ба 48 дахь минут/  гоол хийсэн бол Л.Ямал /22/, Р.Левандовски /36 дахь минут, торгуулийн цохилт/, А.Бальде /45+10/ нар тус тус нэг бөмбөг оруулсан байна. Харин эзэн хааны багаас  К.Мбаппе /5/, Родриго /60/ нар гоолдлоо.  

Тоглолтод энэ улиралд Барсад шинээр элссэн Польш хаалгач Войцех Щенсный 57 дахь минутад улаан хуудас авч, талбайг орхисны дараа түүнийг Иньяки Пенья орлож, “Барселона” баг 57 дахь минутаас хүн дутуу тоглолтыг дуусгасан байна. Барселона клуб Испанийн Супер цомын аваргаар 15 дахь удагаа шалгарсан бол “Реал Мадрид”  13 удаа энэ цомыг өргөж байжээ.

Харин 2 клуб энэ улиралд хамгийн сүүлд өнгөрөгч оны 10 дугаар сарын 26-нд болсон лигийн 11 дүгээр тойргийн тоглолтод “Барселона” баг “Реал”-ыг 4:0 харьцаагаар илүүрхэж байжээ.