Бүгд найрамдах намаас сонгогдсон Дональд Трамп АНУ-ын 47 дахь ерөнхийлөгчийн хувиар манай цагаар мягмар гаригийн 01.00 цагт Цагаан Ордны 1000 гаруй хүний багтаамжтай Капитол Ротунда танхимд тангараг өргөлөө. Түүнтэй хамт дэд ерөнхийлөгч Жей Ди Вэнс мөн тангараг өргөсөн юм. 

Нийтлэлийг зургаар үзэх бол энд дарна уу.

Тангараг өргөх ёслолын үеэр 2 дахь бүрэн эрхийн хугацаагаа эхлүүлсэн Д.Трамп 29 минутын турш үг хэлэхдээ эрх чөлөөний тэмцэгч Мартин Лютер Кингийн илтгэлээс эшлэл авч Америк мөрөөдлийг сэргээж, өмнөх засаг захиргааны үед тулгараад байсан хямрал эмх замбараагүй байдлыг засахаа амласан юм. 

Хэн хэн ирэв?

• Капитол Ротунда танхимд болсон тангараг өргөх ёслолд өмнөх ерөнхийлөгчид болох Билл Клинтон, Жорж “бага” Буш, Барак Обама нараас гадна Аргентины ерөнхийлөгч Хавьер Майлей, Италийн ерөнхий сайд Жоржиа Мелони, БНХАУ-ын дэд ерөнхийлөгч Хан Жэн нарын гадаадын засгийн төрийн тэргүүнүүд оролцжээ. 
• Мөн Их Британы ерөнхий сайд асан Борис Жонсон, FIFA буюу Олон улсын хөл бөмбөгийн холбооны ерөнхийлөгч Итали улсын иргэн Жанни Инфантино, холимог тулааны UFC холбооны ерөнхийлөгч Дана Уайт нар оролцсон нь олны анхаарлыг өөрийн эрхгүй татаж байлаа. 
• Дээр нь технологийн тэрбумтнууд болох Амазоны үүсгэн байгуулагч Жефф Безос, Мета компанийн босс Марк Зукерберг, Apple-ийн удирдагч Тим Күүк, Google-ийн ахлах Сундар Пичай, Тесла компанийн эзэн Илон Маск нарын эрхмүүд Гэгээн Жонны сүмд харагдсан байна. 

Д.Трампын онцолсон таван зүйл

Америкийн алтан үе: 

• Трамп хэлсэн үгээ өөдрөг өнгө аястай эхлүүлэн "Америкийн алтан үе яг одоогоос эхэлж байна. Өнөөдрөөс эхлэн манай улс цэцэглэн хөгжиж байна. Бид бусдын хүндлэлийг хүлээх болно" гэв.

Нэн тэргүүнд авах арга хэмжээ: 

• Ерөнхийлөгчийн тангараг өргөснөөс эхлэн улс орон үндэстэн нэгдэн нягтрахыг уриаллаа. 
• Төрийн тэргүүний ажлыг аваад эхний 100 хоногт нэн түрүүнд хэрэгжүүлэх ажил бол улсынхаа өмнө хилд онц байдал зарлаж, цэрэг хүчний байгууллагыг хууль бус цагаачидтай тэмцэхэд дайчилна гэдгээ амлав. 
• Америк цензурийг нэн дарай зогсоож, үг хэлэх эрх чөлөөг сэргээх тушаалд гарын үсэг зурна. 

Бурхан аварсан:

• Трамп өнгөрсөн ерөнхийлөгчийн сонгуулийн үеэр эмх замбараагүй, үймээн самуунаар далимдуулан амь насанд нь халдах оролдлогын талаар ярив. 
• Бидний үйл хэргийг зогсоохыг хүссэн хүмүүс миний эрх чөлөөг булаан авахыг оролдсон бөгөөд үнэхээр миний амийг авахыг оролдсон билээ. Хэдхэн сарын өмнө Пенсильванийн үзэсгэлэнт газар нутагт алуурчны сум миний чихийг онох тэр үед би яагаад ч юм миний амийг аварсан юм шиг санагдаж, одоо үүнд бүр илүү их итгэлтэй байна. Америкийг дахин агуу болгохын тулд бурхан намайг аварсан гэж хэлсэн байна. 

Ангараг ба Панамын суваг: 

• Д.Трамп хэлсэн үгэндээ АНУ-ын хилээс нэг удаа, дараа нь дэлхийгээс хальж ангараг гаригийн талаар ярьсан юм. 
• Панамын сувгийг нэгдсэн улс хяналтдаа авах хүсэлтэйгээ илэрхийлж, уг суваг одоогоор БНХАУ-ын мэдэлд байгааг хэлжээ. 
• Тэрбээр “Бид үүнийг буцааж авах болно" гэж хэлэв. 
• Мөн Мексик картелийн бүлгүүдтэй тэмцэхээ ил тод илэрхийлсэн бол Мексикийн булангийн нэрийг "Америкийн булан" болгон өөрчилнө гэж хэлэхэд Төрийн нарийн бичгийн дарга асан Хиллари Клинтон инээмсэглэсэн байна.  
• Трамп мөн дээшээ харж, Бид од эрхэст аялж, Ангараг гараг дээр мөрөө гаргах болно.
• Хүн төрөлхтөн алс холын гаригийг колоничлохыг хүсэж байна гэж эртнээс хэлж байсан технологийн тэрбумтан, Д.Трампын зөвлөх Илон Маск энэ үгийг тод инээмсэглэлээр дэмжсэн юм.

Хоёрхон хүйс байдаг: 

• Д.Трамп танхимд цугласан дэмжигчдээсээ хамгийн их алга ташилт хүлээн авсан үг нь хүйсийн талаарх түүний байр суурь.
• Цаашид эрэгтэй, эмэгтэй гэсэн хоёр хүйстэй байх нь АНУ-ын засгийн газрын албан ёсны бодлого байх болно. 
• Трамп төрийн болон хувийн амьдралын бүхий л салбарт арьсны өнгө, хүйсийн ялгааг  нийгмийн инженерчлэлд оруулах болно гэсэн аливаа хүчин чармайлтыг таслан зогсоохоо амласан байна. 
• Тэрээр улс орноо арьс өнгөөр ялгаварлан гадуурхдаггүй, авьяас чадварт суурилсан үзэлтэй болгохыг амлажээ.