Өнгөрөгч долоо хоногийн Баасан гаригт Цагаан ордноос нэгдсэн улсын худалдааны гурван том түнш болох Мексик, Канад, БНХАУ-ын бүх бараа бүтээгдэхүүнд импортын нэмэлт татвар ноогдуулж байгаагаа албан ёсоор зарласан юм. Тухайлбал Канад, Мексик улсуудад 25%, харин БНХАУ-д 10% импортын нэмэлт татвар оноосон билээ.
Яагаад импортын нэмэлт татвар оноох болсон шалтгаанаа эдгээр улсууд АНУ-ыг чиглэсэн сэтгэцэд нөлөөлөх фентанил бодис болон хууль бус цагаачдын урсгалыг зогсооход хангалттай арга хэмжээ аваагүйн шийтгэл хэмээн тайлбарласан.
Тэгвэл энэ шийдвэрийн дараа эдгээр улсууд ерөнхийлөгч Д.Трампын эхлүүлсэн худалдааны дайны эсрэг хариу арга хэмжээ авч эхэлсэн байна.
Канад улсын ерөнхий сайд Жастин Трюдо өнөөдрөөс эхлэн АНУ руу гаргах 106 тэрбум ам долларын дүнтэй импортын бараа бүтээгдэхүүнд нэмэлт 25% ийн татвар ноогдуулж, Канадчуудыг АНУ руу хийх аяллаа цуцлах, Америк согтууруулах ундаа болон бусад бүтээгдэхүүнд бойкотлохыг уриалжээ. Ерөнхийлөгч Д.Трамп албан тушаалаа хүлээж авахаасаа ч өмнө татварын талаар мэдэгдэж байсан. Гэсэн ч соёл, газар зүйн хувьд АНУ-тай маш ойрхон байдаг улсын хувьд эдийн засгийн дайныг цочирдож хүлээж авч байгаа аж. Энэ талаар Канадын хилийн орчмын Виндзор хотын дарга Дрю Дилкенс хэлэхдээ "Трамп дэлхийн дэг журмыг өөрчлөхийг хүсэж байх шиг байна. Хамгийн ойрын холбоотноосоо эхлэхэд бэлэн байгаа хүн бусад улсад юу хийх бол. Детройт, Виндзорыг холбосон гүүрээр өдөр бүр 400 сая канад доллар буюу 272 сая ам.долларын худалдаа явдаг" гэжээ.
Мөн Мексикийн ерөнхийлөгч Клаудиа Шэйнбаум үүнтэй ижилт төстэй арга хэмжээ авахыг холбогдох албан тушаалтнууддаа даалгасан талаар Х хуудсаараа мэдэгдсэн.
Харин энэ үйл явдлын дараа БНХАУ-ын худалдааны яам, дэлхийн худалдааны байгууллагын /WTO/ тогтоосон импортын тарифын дүрмийг илт зөрчсөн хэмээн АНУ-ыг шүүмжилжээ. Энэ мэтчилэн улс хооронд үл ойлголцол үүсээд буй тул Дональд Трамп, Мягмар гаригт Канад, Мексикт татвар ногдуулах үйл явцыг 30 хоногийн хугацаанд түр зогсоох шийдвэр гаргалаа. Үүнийгээ тэр эдийн засгийн эцсийн хэлэлцээр байгуулах боломжтой эсэхийг шалгах 30 хоногийн хугацаа гэж нэрийдэж байна.
Харин Хятадын бараа бүтээгдэхүүнд 10 хувийн татвар ногдуулах шийдвэр өнөөдрөөс эхлэн хүчин төгөлдөр хэрэгжиж эхлэхээр болжээ.
Сэтгэгдэл үлдээх