Монголын Хөлбөмбөгийн холбоог тойрсон асуудал, маргаан одоог хүртэл үргэлжилж буй. Үүнтэй холбогдуулан МХБХ-ны удирдах зөвлөлөөс “Монголын хөлбөмбөгийн орчинд үүссэн асуудлыг судлах, шийдвэрлүүлэх түр хороо”-ны ажлын хэсгийг байгуулан, хоёр удаа хуралдсан  байдаг. 

Тэгвэл тус ажлын хэсгийн зүгээс МХБХ-ны Ерөнхий нарийн бичгийн дарга М.Ганбаатарт шаардлага хүргүүлжээ. 

Шаардлагад “Холбооноос авсан санхүүгийн тайлан, баримт нь ойлгомжгүй, нотлох баримт дутуу орлого зарлагуудтай, нэмэлт баримтгүй байгаа тул 7 төрлийн нэмэлт баримт шаардаж байгаа”-г дурджээ. 

Хөлбөмбөг тайлбарлагч Б.Батзаяа тус шаардлагыг цахим хаягтаа байршуулж, “VAR төслийн хүрээнд 1 тэрбумаас дээш үнэлгээтэй тоног төхөөрөмж, сургалт дагалдах зүйлс орж ирсэн гэсэн тэрийгээ үзүүлэхгүй. Масс гээд телевиз худалдаж авсан гэдгээс өөр олигтой мэдээ байхгүй. Үнэндээ ТВ худалдаж авах ямар ч шаардлагагүй байхгүй. Zeus Sport Marketing-ийн компаниас орж ирсэн 762,020 америк долларыг юунд зарцуулсан, ямар учиртай мөнгө нь ойлгомжгүй. Олон улсын төслийн мөнгө, санхүүжилт гээд мэдэх ёстой олон юм цаана нь хүлээж байна” хэмээн бичжээ.