Хүүхэд, гэр бүлийн хөгжил, хамгааллын ерөнхий газраас хүсэлт гаргаж, СЭМҮТ-ийн холбогдох ажилтнуудтай Асрамж халамжийн төвд үйлчилгээ авч байгаа сэтгэцийн эмгэгтэй, төрх үйлийн өөрчлөлтэй хүүхдүүдийн асуудлаар уулзалт зохион байгуулжээ.

2025 оны нэгдүгээр сарын байдлаар 20 байгууллагын 29 асрамж, халамжийн төвийн үйлчилгээнд хөгжлийн бэрхшээлтэй 93 хүүхэд үйлчилгээ авч байгаагаас хөнгөн хэлбэрийн оюун ухааны хомсдолтой 39, хүндэвтэр хэлбэрийн оюун ухааны хомсдолтой 15, хүнд хэлбэрийн оюун ухааны хомсдолтой 17 хүүхэд, залуус байна. 

Үүнээс насанд хүрсэн сэтгэцийн эмгэгтэй 9 залуу асрамж халамжийн төвүүдэд байгаа аж. Тэд насанд хүрээгүй олон хүүхдүүдтэй хамт үйлчилгээ авч байгаа нь ноцтой эрсдэл үүсгэж болзошгүй юм.

Хэдийгээр шаардлагатай асрамж, халамжийн үйлчилгээг тасралтгүй үзүүлэн ажиллаж байгаа боловч асрамж, халамжийн төвүүдэд эдгээр хүүхдүүдтэй ажиллах мэргэжлийн сэтгэл засалч, хүний нөөц дутмаг байгаа аж. 

Ийнхүү тус уулзалтаар:

1. Асрамж, халамжийн төвд үйлчилгээ авч буй төрх үйлийн эмгэгтэй хүүхдүүдийг урт хугацаанд сэтгэл заслын үйлчилгээнд хамруулахад хамтран ажиллах
2. Асрамж халамж, түр хамгаалах байраар үйлчлүүлж байгаа болон төрх үйлийн эмгэгтэй хүүхдүүдтэй албан хаагчид хэрхэн харилцах, үйлчилгээ үзүүлэх талаар арга зүйн сургалтыг үе шаттай зохион байгуулах
3. Цаашид СЭМҮТ-өөс өндөр насны тэтгэвэрт гарсан ч ажиллах боломжтой сэтгэцийн эмч нарын судалгааг авч, хамтран ажиллах
4. Улсын хэмжээнд сэтгэл засалчдыг бэлтгэх асуудлаар нэн даруй холбогдох байгууллагуудтай хамтран ажиллах зэрэг ажлуудыг хийхээр болов.