Дэлхийн шатрын холбооны /FIDE/  шилдэг эмэгтэй шатарчдын Гран-При цуврал 6 тэмцээний гурав дахь тэмцээн болох Монакогийн Гран-При тэмцээн /Monaco FIDE Women's Grand Prix/ энэ сарын 18-нд нээгдэж бүсгүйчүүд 5 тоглолтыг аль хэдийн хийгээд амжсан байна.

Тавдугаар өргийн тоглолтод МУГТ Б.Мөнгөнтуул тус тэмцээнийг тэргүүлж буй ОХУ-ын их мастер Катерина Лагнотой  цагаанаар тоглож тэнцлээ. Энэ өргийн бүх тоглолт тэнцээгээр өндөрлөжээ.

Эхний өрөгтөө дэлхийн 12 дахь аварга асан Александра Костенюкийг цагаанаар тоглож хожсон тэрбээр дөрөв дараалан тэнцсэнээр  хүснэгтийн 2 дугаарт бичигдэж байна.

Өнөөдөр тамирчид амрах бөгөөд 6 дугаар өргийн тоглолтууд  даваа гаригт явагдана. Энэ өрөгт МУГТ Б.Мөнгөнтуул Казахстаны Бибисара Ассаубаеватай хараар тоглох юм.

80 мянган еврогийн шагналын сантай энэ удаагийн Гран-при тэмцээнд МУГТ Б.Мөнгөнтуулаас гадна

• Хятадын Тан Жунгуй,
• ОХУ-ын Александра Горячкина,  Катарина Лагно,
• Энэтхэгийн  Хюмпи Конеру,  Харика Дронавали,
• Казахстаны Бибисара Ассаубаева,
• Швейцарын Александра Костенюк,
• Испанийн  Сара Хадем,
• Германы их мастер Элизабет Пэйтз нар өрсөлдөж байна.

Тэмцээний аварга энэ сарын 28-нд тодорно.