Жендерийн үндэсний хорооноос хүйсийн тэнцвэрт байдлын тайланг хүргэлээ. 

Тодруулбал, тус хороо нь Жендэрийн Эрх Тэгш Байдлыг Хангах тухай Хууль (ЖЭТБХтХ)-ийн 10 дугаар зүйлд заасан хүйсийн тэнцвэрт байдлын тайланг гаргадаг. Хуулийн 10 дугаар зүйлийн 10.1.1-д “томилогдох төрийн улс төрийн албан тушаалтны дотор аль нэг хүйсийн төлөөлөл Засгийн газар, аймаг, нийслэлд 15 хувиас, дүүрэгт 20 хувиас, суманд 25 хувиас, хороонд 30 хувиас доошгүй байх;” гэж заасан байдаг. 

Үүнд Засгийн газарт томилогдох төрийн улс төрийн албан тушаалтанд Төрийн албаны тухай хуулийн 11.1.3, 11.1.5, 11.1.7-д заасны дагуу Монгол Улсын Ерөнхий сайд, Монгол Улсын Засгийн газрын гишүүн буюу сайд, шадар сайд, Засгийн газрын Хэрэг эрхлэх газрын даргыг тус тус хамруулан авч үзжээ.

2023 онд Монгол Улсын Засгийн газрын бүтцэд 18 эрэгтэй, 3 нь эмэгтэй сайдтай байсан бөгөөд хуульд заасан томилогдох төрийн улс төрийн албан тушаалтны дотор аль нэг хүйсийн төлөөлөл Засгийн газарт 15 хувиас доошгүй байх заалтыг хангаагүй буюу хэрэгжилт 14,2 хувьтай байсан.
 
Монгол Улсын Их хурлын 2024 оны ээлжит сонгуулийн үр дүнд Монгол Улсын ерөнхий сайд, Шадар сайд 3,  Монгол Улсын сайд 2 болон 16 яамдын сайдын бүрэлдэхүүнтэйгээр хамтарсан Засгийн газар байгуулагдсан. Тус Засгийн газарт Байгаль орчин, уур амьсгалын өөрчлөлтийн яам, Соёл, спорт, аялал жуулчлал, залуучуудын яам, Гадаад харилцааны яамны  эмэгтэй сайд нар ажиллаж байгаа хэдий ч өмнөх жилийн үзүүлэлтэд ахиц гараагүй, хуульд заасан квот хангагдаагүй хэвээр байна.