ОХУ-ын теннисчин Мирра Андреева, Арабын Нэгдсэн Эмират улсын нийслэл  Дубай хотноо зохиогдсон “WTA 1000” ангилалын “2025 Dubai Tennis Championships” тэмцээний финалд Данийн тамирчин Клара Таусоныг хожлоо. Ингэснээр 3.6 сая гаруй ам.долларын шагналын сантай тус тэмцээнд анх удаагаа түрүүллээ.   

WTA-гийн дэлхийн чансаанд 14 дүгээрт эрэмбэлэгддэг, өдгөө 17 настай М.Андреева  дэлхийн чансааны 38-д бичигддэг Данийн теннисчнийг 7:6 (7:1), 6:1-ээр хожжээ. Тоглолт 1 цаг 46 минут үргэлжилсэн байна. Дубайн тэмцээний ганцаарчилсан төрөлд 20 нас хүрэхээсээ өмнө түрүүлж байсан цорын ганц теннисчин бол Испанийн тамирчин Рафаэль Надаль (2006 он) юм. М.Андреева теннисчнийхээ замналд хоёр дахь удаагаа, "WTA 1000" ангилалын тэмцээнд анх удаагаа түрүүллээ. Тэрбээр "WTA 1000" ангилалын тэмцээнийг 2009 онд зохион байгуулж эхэлснээс хойш тус тэмцээнд түрүүлсэн хамгийн залуу (17 нас 299 хоног) теннисчин болж байна.

Энэ тэмцээнд түрүүлснээр Оросын теннисчин 3720 оноотой болж, Эмэгтэйчүүдийн теннисний холбооны (WTA) чансааны эхний 10-т багтлаа. М.Андреева 2006 оны наймдугаар сарын 7-нд 17 нас 106 хоногтой байхдаа шилдэг 10-т багтаж байсан Чехийн теннисчин Николь Вайдишовагаас хойш чансааны эхний 10-т багтсан хамгийн залуу теннисчин болжээ.

М.Андреева дээр нь нутаг нэгт Дарья Касаткинаг ардаа орхиж, Оросын номер 1 теннисчин боллоо.