Энэ жилийн цагаан сар амралтын өдрүүдэд тохиож, богино хугацаанд амрах тул зарим төрийн өмчит их, дээд сургуулиуд дотоод журамдаа өөрчлөлт оруулж, 5-9 хоног амрах, цахимаар хичээллэх шийдвэр гаргасан. 

Харин МУИС-ийн зүгээс сар шинийн баярын үеэр хичээлийг цахимаар зохион байгуулах боломжгүй гэх хариуг 2 сарын 21-нд гаргаад байсан юм.  

Уг шийдвэрийг эсэргүүцсэн МУИС-ийн оюутнууд өнгөрсөн амралтын өдрүүдэд фейсбүүк дэх “МУИС-ийн албан ёсны ОЮУТАН, ТӨГСӨГЧДИЙН нэгдсэн групп”-т эсэргүүцлээ илэрхийлж, Оюутны холбоо, Оюутан конгрессын удирдлагуудаа “ажлаа хийж чадахгүй байна, оюутнуудаа төлөөлж чадахгүй байна” хэмээн хүчтэй шүүмжилж байсан юм. 

Тэгвэл МУИС-ийн захиргаанаас сар шинийн баяраар хичээлийг цахимаар зохион байгуулахаар болсноо өнөөдөр мэдэгдлээ. 

Тодруулбал, “МУИС-ийн Оюутны холбоо, Оюутан конгрессоос 2025 оны 2 дугаар сарын 21, 24-ний өдөр ирүүлсэн албан хүсэлт, төрийн өмчит их сургуулиудын хичээл зохион байгуулалтын нийтлэг шийдвэрийн хүрээнд 2025 оны 2 дугаар сарын 28 /Сар шинийн битүүн/, 3 дугаар сарын 3, 4-ний /Шинийн 4, 5/ өдрүүдийн хичээлийг цахимаар зохион байгуулах болсныг мэдээлж байна” гэжээ.