Католик шашны тэргүүн Пап Францисын биеийн байдал хүнд хэвээр байгаа тухай Ватиканы хэвлэлийн алба ням гарагт мэдэгджээ.

Өдгөө 88 настай тэрбээр хоёр уушгиндаа хатгаа тусаад байгаагаас гадна цусны шинжилгээгээр бөөрний дутагдлын шинж тэмдэг илэрсэн байна. Харин өчигдөр буюу бямба гарагт папын биеийн байдал сүүлийн 24 цагийн дотор эрс муудаж, нэмэлт хүчил төрөгчөөр хангаж, цус сэлбэх эмчилгээ хийснийг мэдээлжээ. Ватикан энэ талаар Пап “сонор сэргэг, анхаарал сайн” хэвээр байгаа гэв.

Пап Францис ням гарагийн өглөө Гемеллийн эмнэлгийн 10 давхрын өрөөнөөс Ариун мөргөлд оролцсон гэж мэдэгдэлд дурджээ. Уг өргөлд түүнийг асарч буй хүмүүс мөн оролцсон байна. “Эрүүл мэндийн нарийн төвөгтэй байдал тулгараад байгаагийн зэрэгцээ эмийн эмчилгээний үр дүнг харзнах шаардлагатай байгаа тул урьдчилсан дүгнэлт хийх боломжгүй байна” гэж Ватиканы хэвлэлийн алба мэдэгджээ.

2013 оноос хойш Ромын католик шашны тэргүүнээр ажиллаж буй Францисын эрүүл мэнд сүүлийн хоёр жил нэлээд доройтсон. Тэрбээр залуудаа гялтангийн үрэвслийн улмаас уушгиа тайруулж байсан тул амьсгалын замын өвчлөлд өртөмхий болжээ. Сүүлийн үед папыг ажил үүргээ гүйцэтгэх боломжгүй болж буй тул огцрох магадлалтай гэсэн яриа Ватиканд гараад байна. Францис ням гарагт Ангелусын залбирлыг уншаагүй нь пап ламын албыг хашиж буй 12 орчим жилийн хугацаанд ийнхүү өнжсөн гурав дахь тохиолдол болжээ.

Гэхдээ папын орлогч гэгддэг Ватиканы төрийн нарийн бичгийн дарга, кардинал Петро Паролин ийм яриаг няцаажээ. Одоо бид Ариун эцгийн эрүүл мэнд, эдгэрэх, Ватиканд буцаж ирэх тухай бодож байна. Зөвхөн эдгээр нь хамгийн чухал зүйл болоод байна" гэж тэр өчигдөр Италийн хэвлэлд ярьсан байна.