БНСУ-ын Кёнги аймгийн Ансон хотод  өндөр хурдны замын барилгын талбайд гүүр нурсны улмаас хоёр хүн амиа алдаж, долоон хүн гэмтжээ. Мөн гүүрний нурангид дарагдсан нэг хүнийг аврах ажиллагаа үргэлжилж буй аж. 

Ослын үеэр Сөүл-Сэжонг чиглэлийн хурдны замын нэгэн хэсэг дээр барилгын ажил явагдаж байсан ба осол өглөөний 9:50 цагийн орчимд болсон байна. Гүүрний тулгуур баганын дээр байрлуулсан хэд хэдэн бетон хавтан унаж, доор нь ажиллаж байсан 10 хүнийг даржээ. Тэднээс хоёр нь нас барж, долоон хүн хүнд бэртэл авсан байна. Аврагчид үлдсэн нэг хүнийг аврах ажиллагааг үргэлжлүүлж байна. Галын албаныхан эхэндээ гурван хүн нас барсан гэж мэдээлж байсан ч дараа нь үүнийг залруулж, хоёр хүн амиа алдсан гэж мэдэгдсэн байна. Барилгын гүйцэтгэгч Hyundai Engineering компани бүх ажилтнуудаа сэргээн босголтын ажилд дайчлахаас гадна туслан гүйцэтгэгчдийн хэдэн ажилчин осолд өртсөн талаар тодруулж байгаа аж. Үндэсний галын агентлаг осолд өртсөн хүмүүсийг хайх, аврах ажиллагаанд онцгой байдлын тушаал гаргаж, гал сөнөөгчдийг дайчилжээ.