Аргентины теннисчин Себастьян Баэс Риогийн нээлттэй тэмцээний финалд Францын Александр Мюллерийг буулган авснаар Өмнөд Америкийн хамгийн том тэмцээнд хоёр жил дараалан түрүүлсэн анхны тамирчин боллоо.

Бразилын Рио-де-Жанейро хот дахь “Jockey Club Brasileiro” цэнгэлдэх хүрээлэнгийн шороон талбайд ням гарагт болсон финалын тоглолт нэг цаг 27 минутын турш үргэлжилж, С.Баэс 6:2, 6:3 онооны харьцаагаар илүүрхсэн байна.

“Бүтэн долоо хоногийн турш үзүүлсэн тоглолтоороо би бахархаж байна. Би тоглолт бүрдээ сэтгэл хангалуун байна. Мэдээж тэмцээнд түрүүлэхийг хүсэж байгаа учраас финалын тоглолтууд өөр байдаг. Тоглолтондоо анхаарлаа төвлөрүүлэх гэдэг бол финалын тоглолтын хамгийн хэцүү зүйл. Гэхдээ дасгалжуулагч болон багийнхны маань дэмжлэг надад анхаарлаа төвлөрүүлэхэд ихээхэн дэм болсон” гэж С.Баэс тоглолтын дараа ярилцлага өгөхдөө хэллээ.

Өдгөө 24 настай тэрбээр Мэргэжлийн теннисчдийн холбооны /ATP/ цуврал тэмцээнүүдээс долоо дахь түрүүгээ хүртэж буй нь энэ бөгөөд зургаад нь шороон талбайд аваргалсан байна. Риогийн нээлттэй тэмцээн нь Өмнөд Америкт болдог цорын ганц “ATP 500” ангиллын тэмцээн, Бразилд болдог цорын ганц “ATP Tour” ангиллын тэмцээн юм.