Үдээс хойш эхэлсэн их хэмжээний цахилгаан тасалдал нь хойд хэсгийн Арика боомт хотоос өмнөд нутгийн Лос Лагос хүртэл улс даяар найман сая өрхөд нөлөөлсөн гэж албаны хүмүүс мэдэгдсэн юм. 

Тус улсын нийслэл Сантьяго хотод гэрлэн дохио унтарч, цахилгаан шатанд хүмүүс гацаж, метроны сүлжээ хаагджээ. Тус улсын Дотоод хэргийн сайд “Аюулгүй байдлыг хангахын тулд шөнийн цагаар хөдөлгөөнийг хязгаарлаж, 22.00-06.00 цаг хүртэл хөл хорио тогтоож байна" гэж мэдэгдсэн байна. 

Ерөнхийлөгч Габриэль Борич мягмар гарагийн орой болсон хэвлэлийн бага хурлын үеэр "Өнөөдөр сая сая оршин суугчдын хувьд хүнд өдөр байлаа. Мягмар гарагийн орой гэхэд дөрвөн сая орчим айлын цахилгаан эрчим хүчийг сэргээсэн” хэмээн мэдэгдэв. Цэргүүд болон үндэсний цагдаагийн ажилтнуудыг гамшигт нэрвэгдсэн бүс нутаг руу илгээсэн гэж албаны хүмүүс мэдээлсэн.

Тус улсын хэмжээнд онцгой байдлын алба, эмнэлэг, хорих анги, нисэх онгоцны буудлууд нөөц цахилгаан эрчим хүчний систем, генератор дээр ажиллаж байна гэж гамшгийн үндэсний агентлаг мэдээллээ.