Малайзын засгийн газар арав гаруй жилийн өмнө сураггүй болсон MH370 онгоцыг эрэн хайх ажиллагааг дахин эхлүүлэхээр болсноо өнгөрсөн 12 сард мэдэгдэж байсан. 2014 оны 3-р сарын 8-нд 239 хүнтэй Боинг 777 онгоц Куала Лумпураас Бээжинг чиглэн явж байгаад радарын дэлгэцээс алга болсон. “Ocean Infinity” компани 2018 онд Энэтхэгийн далайд 46,300 хавтгай дөрвөлжин миль талбайг хамарсан эрэн хайх ажиллагааг зохион байгуулсан боловч онгоцны ул мөр олдоогүй, зөвхөн зарим хэсгүүдийн хог хаягдлыг цуглуулсан байдаг.

Уг үйл явдал нисэхийн түүхэн дэх хамгийн том нууцуудын нэг бөгөөд онгоц сураггүй болсноос хойш арав гаруй жилийн дараа эрлийн ажиллагааг ийнхүү  эхлүүлжээ. Далайн хайгуулын "Ocean Infinity" компани сураггүй болсон онгоцыг хайж эхэлсэн тухай Малайзын Тээврийн сайд Anthony Loke мягмар гарагт мэдэгдсэн юм. Хайлтын ажиллагаа хэр удаан үргэлжлэх талаар нарийн зүйлийг хараахан хэлэлцээгүй байна гэв.

Ээжийгээ сүйрсэн онгоцонд алдсан Малайзын 36 настай иргэн Grace Nathan "Удаан завсарласны дараа эрлийн ажиллагаа дахин эхэлж байгаад бид маш их баяртай байна” хэмээн Agence France-Presse-т ярьсан юм. 

Энэтхэгийн далайн өмнөд хэсгийн 5,800 хавтгай дөрвөлжин миль талбайд "мэргэжилтнүүд, судлаачдын хийсэн хамгийн сүүлийн үеийн мэдээлэл, мэдээллийн дүн шинжилгээнд үндэслэн" хайгуулыг хийх аж.