Боловсролын сайд П.Наранбаяр өнөөдөр мэдээлэл хийж ирэх хичээлийн жилд буюу 2025-2026 оны хичээлийн жилийн бүтцийг танилцууллаа. Сургуулийн үйл ажиллагаа сайн төлөвлөлт дээр тогтдог. Тиймээс хичээлийн жилийн бүтцийг эрт зарлаж, бэлтгэл ажлыг хангуулах зорилготой байгаа аж.

“Happy January” буюу “Аз жаргалтай нэгдүгээр сар” иж бүрэн бодлогыг Монгол Улсын Засгийн газраас зарлана. Үүнтэй холбоотойгоор сургуулийн хүүхдийн хичээлийн жилийн амралтуудыг зохицуулах шаардлага гарсан. Ингэхдээ хөдөөгийн сургууль болон нийслэлийн сургуулиудын хоорондын амралтын хугацаа өөр байдгийг онцлов.

Энэ жил 3 улирлын бүтэцтэй хичээллэж, бага ангийн сурагчдыг 12 дугаар сарын сүүлээс нэгдүгээр сар дуустал буюу 5 долоо хоног амраасан. Ингэхдээ олон жилийн томуу төст өвчин, ханиадны дэгдэлтийг тооцоолж уг зохицуулалтыг хийсэн аж.

Харин Боловсролын яамны зүгээс 2025-2026 оны хичээлийн жилд мөн 3 улирлын бүтцээр хичээллэх бол амралтыг нэг долоо хоногоор сунгажээ.

Тодруулбал, бага сургууль 12 дугаар сарын 15-наас амарч, нэгдүгээр сарын 26-ны даваа гарагт хичээл эхлэх төлөвлөлтийг хийлээ. Ийнхүү 6 долоо хоног сурагчдыг амрааж, түгжрэлийг бууруулах, ид хүйтний үед хүүхдүүдийг ханиад томуу тусахаас сэргийлэх зорилготой аж. Үүнтэй уялдуулж эцэг эхийн амралтыг зохицуулах талаар бусад яамд бодлогоо гаргана гэв.

Харин дунд, ахлах сургуулиуд долоо хоногийн дараа буюу 12 сарын 22-ноос эхлэн 5 долоо хоног амрах юм. Амарсан эхний долоо хоног цахимаар хичээллэнэ. Ийнхүү амралтыг 1 долоо хоногоор сунгасан тул 6 дугаар сард 1 долоо хоног сунгаж хичээллэх аж. Өөрөөр хэлбэл, 6 сарын 8-12-ныг хүртэл хичээллэх юм. Уг сүүлийн долоо хоногт шалгалтын долоо хоног байх юм.

Харин хөдөө орон нутгийн тухайд бага сургуулийн сурагчид 4 долоо хоног, дунд, ахлах сургуулийн сурагчид 5 долоо хоног амарна. Мөн 4 сарын эхээр буюу ид мал төллөлтийн үеэр нэг долоо хоног илүү амрах буюу 14 хоног амрах аж.

Ташрамд, хуульд 170-185 хоног хичээллэх зохицуулалттай байдаг бөгөөд яг энэ хугацаандаа амралт, хичээлийг бүрэн зохицуулж байгаа юм.