УДЭТ-ын жүжигчин Отгоны Гэрэлсүх XVII жарны "Элдэв эрдэнэт" хэмээх Модон могой жилийн Сар шинийн баярын босгон дээр Монгол Улсын гавьяат жүжигчин хэмээх хүнтэй цолоор шагнууллаа. 

Тэрээр “Өнөөдөр туурга тусгаар Монгол Улсынхаа төр засаг түмэн олонд үнэлэгдэж, Монгол Улсын гавьяат жүжигчин цол авсандаа баяртай байна. Би 1987 онд 14 настайдаа Р.Дамдин найруулагчийн бүтээл "Амьдралын нахиа" киногоор уран бүтээлийн гараагаа эхэлж, Ч.Найдандорж найруулагчийн "Ромео Жульетта" жүжгийн Ромеогийн дүрд тоглон, театрын гараагаа эхэлж байсан. 

Хүүхэд бага наснаасаа Монголын хүүхдийн ордонд Гавьяат багш Даваахүүгийн удирдлага дор суралцаж эхэлсэн. Ийм том цол хүртэнэ гэж бодож байсангүй. Урдах ажлаа л бодож хүнд хэрэгтэй дүр хүргэх юм сан гэж хичээж явдаг. Өнөөдөр энэ шагналыг авдаг нь бидэнд өшөө их олон зүйл хийж бүтээх, манай театрыханд бидний урлагийнханд  маш олон чухал зүйл байна гэдгийг ойлгож авлаа. Гадаа талбайд миний ээж хүлээж байна. Өглөө аавыхаа зурганд мөргөсөн. Миний хамгийн их бодсон зүйл бол төрүүлж өсгөсөн аав ээждээ их талархаж байна” хэмээн сэтгэгдэлээ хуваалцсан юм.