Үйлчилгээний хүртээмж, дэмжлэгийг сайжруулахын тулд Сөүл хотын захиргаа тус хотод байгаа гадаадын оршин суугчдад зориулсан хүүхэд асрах тэтгэмжийн насны хязгаарлалт зэрэг олон жилийн хуулиудыг шинэчилжээ. Оршин суугчдын санал хүсэлтийн дагуу хотын захиргаа ням гаригт хуучирсан 10 журмыг сайжруулах шаардлагатай байгааг тогтоосон. Өөрчлөлтүүдийн дотроос гадаадын оршин суугчтай холбоотой хоёр бодлогыг шинэчлэн боловсруулахаар сонгосон юм. 

Гадаад оршин суугчдын хүүхдүүд солонгос хүүхдүүдээс ялгаатай нь зөвхөн 3-5 насандаа хүүхэд харах үйлчилгээний 50 хувийн татаас авдаг байсан. Шинэчилсэн бодлого нь нярайгаас 5 нас хүртэлх бүх хүүхдэд үзүүлэх дэмжлэгийг солонгос үндэстний хүүхдүүдтэй адил тэгш хүртэх боломжтой болж буй юм. Энэхүү бодлого нь Солонгосын иргэншилгүй эсвэл эцэг эх нь хоёулаа гадаадын иргэн хүүхдүүдэд хамаарна.

2023 онд тус хот гадаадын иргэдийн 3-5 насны 1480 хүүхдэд 1.7 тэрбум воны татаас олгохоор шийдвэрлэсэн. Одоо нярайгаас 5 хүртэлх насны хүүхдүүд хамрагдах боломжтой болсноор Сөүл хот төсвөө 3.5 тэрбум вон болгон нэмэгдүүлж, нийт 3100 хүүхдийг дэмжих зорилготой байна. Энэ нь нэгдүгээр сараас хойш хэрэгжиж, сүүлийн хоёр сарын хүүхдийн асрамжийн зардлыг нөхөх юм байна.

Энэхүү зохицуулалтын шинэчлэл нь Сөүлд бүртгүүлсэн гадаадын оршин суугчдын тоо өссөөр байгаатай холбоотой юм. Гадаадын хүн ам 2021 оны эцэст 226,569 байсан бол нэгдүгээр сард 265,452 болж өссөн байна. "Хотын захиргаа эдгээр өөрчлөлтийг бодитоор мэдрэхийн тулд оршин суугчдын өдөр тутмын амьдралд нөлөөлдөг дүрэм журмыг үргэлжлүүлэн сайжруулах болно" гэдгээ хэлсэн юм. Мөн шинэчлэлийг үр дүнтэй явуулахын тулд хэрэгжилтийн явцыг сайтар хянаж байх болно” гэв.