Чингэлтэй дүүргийн 14, 18 дугаар хороо, Сүхбаатар дүүргийн 14 дүгээр хорооны нутаг дэвсгэрт 158 га талбайд Сэлбэ дэд төвийн гэр хорооллыг орон сууцжуулах төслийг хэрэгжүүлж эхэлсэн. 

Тэгвэл Сэлбэ дэд төвийн гэр хорооллыг орон сууцжуулах төслийн газар чөлөөлөлт 80 гаруй хувьтай үргэлжилж байна. Өнөөдрийн байдлаар 1683 айлтай нөхөн олговрын гэрээ байгуулснаас 1663 айлын нөхөн олговрыг олгоод байгаа аж. Мөн 1067 нэгж талбарыг цэвэрлэж, ариутгасан бөгөөд газар чөлөөлтийн хүрээнд 2800 гаруй янданг буулгаснаар агаарын бохирдол буурахад нөлөөлж байна хэмээн албаныхан мэдэгдэв.

Одоогоор газрын нөхөн олговрын гэрээ байгуулаагүй 340 гаруй айл үлдээд байгаа бөгөөд дээрх айлууд нь хув хүнээс шалтгаалсан бичиг баримтын зөрчилтэй, газар эзэмшигч нь нас барсан, гадаад улс руу явсан, эд хөрөнгийн маргаантай айлууд байгаа аж. 

Дээрх айлуудад боломжит бүрх хувилбараар бичиг баримтын болон хууль эрх зүйн зөвлөгөө, туслалцаа үзүүлж байна. 

Харин нөхөн олговрын гэрээ хийсэн 1683 айлын газрыг үнэлэхдээ гурван шалгуурыг тавьжээ. 

1. Уулын орой, өндөрлөг газар буюу ашиглалт багатай газар амьдардаг айлуудын газрын 1 мкв-ыг 175 мянган төгрөгөөр
2. Төв зам дагуу амьдардаг айлуудын газрын 1 мкв-ыг 380 мянган төгрөгөөр
3. Бусад байршилд амьдардаг айлуудын газрын 1 мкв-ыг 240 мянган төгрөгөөр тус тус үнэлж байгаа гэнэ.

Түүнчлэн газрын үнээс гадна эд хөрөнгө /ногоон байгууламж, явган зам, жорлон гэх мэт/, үл хөдлөх хөрөнгө /байшин, гарааш гэх мэт/ бүрийг тус бүрчлэн үнэлж байгаа аж. 

Ийнхүү нэг айлд дунджаар 150-300 сая төгрөгийн нөхөн олговор олгож байгаа бөгөөд одоогоор нөхөн олговорт нийтдээ 300 гаруй тэрбум төгрөг зарцуулаад байгаа юм.