Сар шинийн баярын амралтын өдрүүдээр буюу 3 сарын 01-06-ны өдрийг хүртэл ОБЕГ  өндөржүүлсэн бэлэн байдлын зэрэгт шилжин ажиллаж, давхардсан тоогоор 438 алба хаагч, 103 нэгж тусгай зориулалтын автомашинтайгаар үүрэг гүйцэтгэсэн байна. 

Ийнхүү алба хаагчид гамшиг, аюулт үзэгдэл, гал түймрийн 68 удаагийн дуудлагаар ажиллаж, нийт 16 иргэнд тусламж, үйлчилгээ үзүүлэн, мөс, цасанд суусан 4 автомашиныг татан гаргаж, аюулгүй байдлыг ханган ажиллажээ. 

Тухайлбал, Баянхонгор аймгийн Баянговь сумын төвөөс хойд зүгт 70 км зайд суудлын автомашин цасанд суусан, гаргаж чадахгүй 9 цаг болсон тухай дуудлагыг 03.05-ны өдрийн 20:04 цагт хүлээн авчээ. Ийнхүү тус аймгийн Онцгой байдлын газрын Баянговь сум дахь Эрэн хайх, аврах бүлгийн алба хаагчид болон сумын Цагдаагийн тасгийн алба хаагчдыг очиход иргэн З-гийн “Toyota Premio” загварын суудлын автомашин 4 зорчигчтой /3 том хүн, 1 хүүхэд/ цасанд суусан байсныг татан гаргажээ.

Мөн Баянзүрх дүүргийн 10 дугаар хороонд суудлын автомашин авто замын хажуугийн гэрэлтүүлгийн тулгуур багана мөргөж, нэг хүн автомашинаас гарж чадахгүй байна гэсэн дуудлагыг 03.05-ны өдрийн 16:05 цагт хүлээн авчээ. Дуудлагын дагуу нийслэлийн Аврах ангийн алба хаагчдыг очиход иргэн Д /42 настай, эмэгтэй/ “Toyota Camry” загварын суудлын автомашинаар гэрэлтүүлгийн тулгуур багана мөргөж, дарагдсаны улмаас автомашинаас гарч чадахгүй байсныг ажиллан эсэн мэнд гаргаж, Хонхор тосгоны Эрүүл мэндийн төвд хүлээлгэн өгсөн байна.

Ташрамд, хүн, ам олноор цуглардаг худалдаа үйлчилгээний болон галын онц аюултай нийт 1225 объектод гамшгаас хамгаалах болон гал түймрийн улсын хяналт шалгалтыг зохион байгуулж, 8422 зөрчил дутагдлыг илрүүлэн, 2104 зөрчлийг шалгалтын явцад арилгуулж, заавал биелүүлэх албан шаардлага 996, мэдэгдэл 452, танилцуулга 12, зөвлөмж 13 тус тус хүргүүлсэн юм.