Өнөөдөр буюу гуравдугаар сарын 6-ны 14:00 цагт Монгол Улсын Засгийн газар хуралдаж, ЗГХЭГ-ийн дарга Н.Учрал “Цахим мөрийтэй тоглоомыг бүрэн хориглох хуулийн төсөл”-ийг УИХ-д нэн яаралтай өргөн барихаар болсон талаар мэдээлэл өглөө. 

ҮСХ-ноос хийсэн судалгаагаар 2023 онд Эдийн засгийн гэмт хэрэг 200 бүртгэгдэж, 2024 онд уг гэмт хэргийн улмаас нийт 417.2 тэрбум долларын хохирол учирсан гэх дүн гарчээ. Үүнийг насны бүлгээр нь авч үзвэл 18-29 насныхан 9.2 хувийг, 30-39 насныхан 47.7 хувийг эзэлж байна. 

Нийтдээ манай улсаас 1.7 их наяд төгрөг буюу 500 сая ам.доллар гадаад улс руу шилжсэн байна. Харин 6000-77000 ам.доллар хүртэл гэрээ байгуулж, зөвхөн цахим мөрийтэй тоглоомын үйл ажиллагаа явуулдаг 1XBET-ээс манай улс руу зар сурталчилгааны зорилгоор 976 ам.мянган доллар шилжиж иржээ. 

Нэг ёсондоо зар сурталчилгаанд буюу бүх төрлийн үйл ажиллагаанд спонсорлох байдлаар 1 сая ам.доллар хүрэхгүй валют орж ирсэн хэр нь гадагшаа 500 сая ам.долларыг урсгаж байна гэх тооцоолол гарсан байна. 

Өнгөрсөн хугацаанд ХХЗХ-ноос цахим мөрийтэй тоглоомын үйл ажиллагаа явуулдаг 6036 домэйн хаягийн Монгол Улсаас хандах хандалтыг хязгаарласан хэдий ч линкнүүдийг сольж, VPN ашиглан энэ үйл ажиллагааг явуулсан хэвээр байна. Эдгээр аж ахуйн нэгжүүдэд Монополын эсрэг газраас өнөөдөр хүчин төгөлдөр мөрдөгдөж буй хуулийн дагуу зөрчлийн шинжтэй үйлдлүүдэд хязгаарлалт хийн, зөрчлийн хуулиар 13.5 сая төгрөгийн торгууль ногдуулсан. Өөрөөр хэлбэл, өнөөдөр хүчин төгөлдөр мөрдөгдөж буй хуулиар ийм бага торгууль ногдуулсан гэсэн үг. 

Иймд Засгийн газраас Зөвшөөрлийн тухай хуульд өөрчлөлт оруулж, энэ төрлийн үйл ажиллагааг бүрэн хориглохоор УИХ-д өргөн мэдүүлэхээр боллоо. 

Түүнчлэн агент буюу зуучлалын үйл ажиллагаа эрхэлж байгаа үйлдэл, цахим мөрийтэй тоглоом тоглох, сурталчлах, зохион байгуулах бүх үйлдэлд эрүүгийн хариуцлагыг чангатгаж өгнө гэв.