Тавантолгойн Ухаа худгийн ордын эзэмшил хуульд нийцсэн эсэх асуудал сүүлийн үед олны анхаарлыг татаад байсан. Тэгвэл өнөөдрийн засгийн газрын хуралдаанаар уг асуудлаар хэлэлцсэнийг ХЗДХ-ийн сайд О.Алтангэрэл танилцууллаа. 

Тэрбээр “Ашигт малтмалын тухай хуулийн 8.1.7, Төрийн болон орон нутгийн өмчийн тухай хуулийн 8.1 дэх хэсгийг зөрчиж, тодорхой ордыг стратегийн ач холбогдол бүхий ашигт малтмалын ордод хамааруулах тухай УИХ-ын 2007 оны тогтоолыг биелүүлэлгүйгээр Засгийн газар, “Энержи ресурс” ХХК-ийн хооронд байгуулсан ашигт малтмалын тусгай зөвшөөрлийг шилжүүлэх тухай гэрээний холбогдох хэсгийг хуульд нийцүүлэх арга хэмжээ авах тухай тогтоолын төслийг УИХ-д өргөн мэдүүлэхээр шийдвэрлэлээ. 

Уг тогтоолын төсөлд Өмнөговь аймгийн Цогтцэций суманд байрлах Ухаа худаг ашигт малтмалын ордын тусгай зөвшөөрөл эзэмшигч хуулийн этгээдтэй хэлэлцээр хийж, Ашигт малтмалын тухай хуулийн 8.1.7-д заасны дагуу УИХ-д өргөн мэдүүлэхийг Засгийн газар, Ерөнхий сайд Л.Оюун-Эрдэнэд үүрэг болгосон заалт бий. 

Тус тогтоолыг гаргах хууль зүйн үндэслэлийн тухайд, УИХ-аар хэлэлцүүлж,  Засгийн газарт танилцуулах ёстой процесс зөрчигдсөн учир стратегийн ач холбогдол бүхий ашигт малтмалын орд гэж УИХ-аас тогтоосон энэхүү ордыг хувийн хэвшлийн аж ахуйн нэгжид эзэмшүүлснийг хуульд нийцүүлэх нь зүйтэй байна. Үүнийг шийдвэрлэх эрх мэдэл нь гагцхүү УИХ-д байгаа учир тогтоол баталж, уг тогтоолын дагуу Засгийн газар тус аж ахуйн нэгжтэй хэлэлцээр хийнэ. Ийнхүү эзэмшлийн хувь хэмжээг тогтоох нь зүйтэй гэж үзсэний үндсэн дээр боловсруулсан” гэв.