Сэлэнгэ Бодонс баг NBA-ийн тоглогч DeMarcus Cousins Монголд газардлаа. Түүний хувьд манай Үндэсний дээд лигт тоглож буй хамгийн алдартай тамирчин болж байна.

Энэ талаар Сэлэнгэ бодонс багийн эзэн Л.Наранбаатар "NBA супер од манай улсад тоглохоор ирлээ. Энэ бол түүхэн цаг мөч юм. Үндэсний дээд лигийн тоглолт дөрөвдүгээр сарын 30-нд дуусна. Хэрэв манай баг финал хүртэл өрсөлдвөл Demarcus Cousins 5-р сард буцна гэсэн үг юм. Бэлтгэлээ маргааш 12 цагаас эхлүүлнэ. Cousins-тай би өөрөө холбогдсон. Манай ахлах дасгалжуулагч дэлхийд нэртэй хүн. Тэр хүн холбоо барихад тусалсан. Cousins-ийн хувьд ид үе дээрээ явж байгаа залуу тамирчин. Тэрээр жаахан авиртай гэдгээрээ дэлхий дахинд танигдчихсан. Заримдаа багийнхнаа зодчихдог. Багийн эзнээ зодсон тухай ч сонсогдож байсан. Шүүгч нартай маргаан үүсгэдэг гэх мэт авиртай тал бий. Гэхдээ Монголд ирээд хүндэтгэлтэй хандах байх гэж бодож байна. Гэрээнд энэ талаар тусгасан. Миний хамгийн их санаа зовж буй зүйл бол эсэн бусын зүйл битгий болоосой л гэж бодож байна. Талбай дээр янз бүрийн л сэтгэл хөдлөл гарна" гэлээ.