Монголбанкны мөнгөний бодлогын хороо гуравдугаар сарын 6, 7-ны өдөр хуралдаж бодлогын хүүг хоёр хувиар нэмж, 12 хувь болголоо. 

Мөнгөний бодлогын хүү 2024 онд тогтвортой бууж, зургадугаар сараас хойш 10 хувьтай байсан юм. Цаашид мөнгөний бодлогын хүү тогтвортой буух болов уу гэх хүлээлт байсан ч 2 нэгжээр нэмэх болсныг Монголбанкны Ерөнхийлөгч Б.Лхагвасүрэн ингэж тайлбарлалаа. Тэрээр

• АНУ-ын бодлого нь түүхий эдийн зах зээлд сөргөөр нөлөөлнө.
• БНХАУ-ын гангийн эрэлт муу байгаа нь нүүрс, төмрийн хүдрийн үнэ унах шалтгаан болно.
• Инфляц улсын хэмжээнд 9.6 хувь гарсан. Тиймээс Монголбанк инфляцын төсөөллөө нэмэгдүүллээ. Ингэснээр энэ онд инфляцын түвшин Монголбанкны зорилтот түвшнээс давж, ирэх оны хоёрдугаар улирлаас зорилтот түвшинд хүрнэ. 
• Шинээр хэрэгжүүлэх томоохон бүтээн байгуулалтыг дотоодоос санхүүжүүлэх орон зай байхгүй учир гадаадын санхүүжилтээр хийх боломжтой.
• Урьдчилсан гүйцэтгэлээр эдийн засгийн өсөлт 4.9 хувьтай гарсан нь төсөөлснөөс муу байна. Эдийн засгийн өсөлт ийнхүү удааширсан нь газрын тосны олборлолт багассан, малын хорогдол нэмэгдсэн, боловсруулах салбарын саарсан, хөдөө аж ахуйн үйлдвэрлэл агшсантай холбоотой байна. Гэсэн ч эдийн засгийн өсөлтийн хүлээлтийг 7-8 хувьд хэвээр хадгалав. 
• Цалин, тэтгэвэр, тэтгэмжийн орлогыг даган хэрэглээний зээлийн өсөлт өндөр хэвээр байна. 
• Тэтгэврийн зээл нэмэгдэж, өр орлогын харьцаа 84 хувьд хүрсэн нь зээлдэгчдийн хувьд санхүүгийн ачаалал өндөр байгааг харуулж байна.

Гадаад болон дотоодын эдгээр нөхцлийг харгалзан мөнгөний бодлогын хүүг 12 хувьд болголоо. 

Үүнээс гадна 

• Хэрэглээний зээлийн өр, орлогын харьцааны дээд хязгаарыг 50 хувьд шинэчлэн тогтоов. 

Тодруулбал, өрхийн өрийн дарамтыг бууруулах, зээлийн хэт өсөлтөөс сэргийлж, санхүүгийн салбарын тогтвортой байдлыг хангахын тулд энэхүү шийдвэрийг гаргажээ. Мөн тэтгэвэр, тэтгэмжийн орлого барьцаалсан зээлийн хувьд зээлийн сарын төлбөрөө төлсний дараах зээлдэгчид үлдэх орлого нь амьжиргааны доод түвшнийг хангахад хүрэлцэхүйц буюу түүнээс доошгүй байхаар тогтоов.