Зүүн гурван аймагт болон Архангай аймагт гарсан ой, хээрийн түймрийн талаар УОК, ОБЕГ-аас мэдээлэл өглөө. 

ОБЕГ-ын Гал түймэртэй тэмцэх газрын дарга, хурандаа Ц.Нямбаяр: Он гарснаас хойш бол нийт 14 ой, хээрийн түймэр гарсан байна. Энэ гуравдугаар сард Дорнод, Хэнтий, Сүхбаатбар, Архангай аймагт 11 удаагийн ой, хээрийн түймэр бүртгэгдлээ. Энэхүү 11 түймрийн нэг болох Архангай аймгийн Хайрхан сумын түймрийг цурманд оруулж, унтраахаар ажиллаж байна. Зүүн гурван аймагт гарсан 10 түймрийн Сүхбаатар аймгийн Эрдэнэцагаан, Асгат суманд гарсан түймэр унтраагүй, бусдыг нь унтраасан. Энэхүү хоёр унтраахад хүндрэлтэй байгаа зүйл нь нийт нутгаар салхитай байгаатай холбоотой юм. Тодруулбал, түймрийн газарт 6-18 м/с хүчтэй салхитай байсан учир богино хугацаанд тархаад байна.

Түймэр гарсан шалтгааныг тогтоохоор хууль хяналтын байгууллага ажиллаж байна. Урьдчилсан байдлаар түймрүүдийн шалтгааныг харвал,

• Хогийн цэг дээрээс салхины улмаас асах
• Айлын яндангаас үсэрсэн цогноос асах
• Өвөлжөө, бууц санаатайгаар шатааснаас гарсан байна гэлээ. 

Хохирлын улмаас гарсан хохирол

• 22 хашаа саравч
• 16 монгол гэр
• 2 автомашин
• Тодорхой тооны мал шатжээ. Хохирлын үнэлгээг тогтоохоор ажиллаж байгаа аж. 

Сэрэмжлүүлэг

• Нийт нутгаар ойрын өдрүүдэд хүчтэй салхи шуургатай, говь тал, хээрийн нутгаар 18-20 м/с хүрч шороон шуурга шуурч, хүйтрэхээр байна.
• Мөн нутгийн зарим хэсгээр нойтон цас орохоор байгаа тул УОК-оос мал төллөж буй энэ үед бэлтгэлтэй байхыг малчдад санууллаа. Иймд иргэд та бүхэн цаг агаарын мэдээллийг тогтмол авч, дор бүрнээ анхаарал болгоомжтой байхыг сэрэмжлүүлэв. 
• Түүнчлэн гол, мөрний мөс өмнөх жилүүдтэй харьцуулахад 10-80 см нимгэн байгаа тул мөсөн дээгүүр зорчихгүй байхыг анхааруулав. 
• Баруун аймаг цас ихтэй байгаа. Харин ойрын өдрүүдэд дулаарах төлөвтэй байгаа тул шар усны үерээс хамгаалахыг сэрэмжлүүллээ.